Estudante ESJ 4 setembru, Balide, Dili. Imajen Tatoli/Dok

DILI, 10 jullu 2021 (TATOLI) – Diretór Servisu Edukasaun Munisípiu Dili, Duarte Bragansa, informa posibilidade boot, eskola rua; Ensinu Sekundária Jerál (ESJ) 4 setembru ho ESJ 5 de maiu, seidauk bele re-ativa aula prejensiál tanba to’o agora seidauk submete dadus kona-bá persentajen vasina funsionáriu, profesór-sira iha eskola rua refere.

“Ha’u seidauk simu dadus profesór hira mak simu ona vasinasaun no hira mak seidauk simu vasina hosi eskola rua ne’e. Ha’u konsidera eskola rua ne’e posibilidade sei difisil atu re-ativa eskola iha segunda (19/07),” Duarte Bragansa informa bá Agência Tatoli via telefónika, sábadu ne’e.

Diretór Eskola Ensinu Sekundáriu Jerál (ESJ) 4 setembru, Balide, Dili, Sergio da Cruz informa katak nia parte seidauk aprezenta dadus vasinasaun profesór sira-nian bá SEMD tanba profesór lubuk ida mak seidauk vasina.

“Ami iha totál profesór na’in-114 no  profesór 27 mak simu ona vasina, falta profesór 87,” Sergio da Cruz hateten.

Bá profesór 87 ne’ebé seidauk simu vasina, nia parte kontakta nafatin atu bele aselera vasina hodi bele kontribui ba prosesu ensinu aprendizajen prejensiál.

Agência Tatoli mós tenta konfirma ho Diretór Eskola ESJ 5 de maiu, Becora liuhosi telefónika maibé telefone la ativa.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here