Membru kooperativa Kréditu Uniaun Rai Didiak ba Futuru (RADIFU), Victorino Barreto. Imajen/SEKoop

AINARO, 10 jullu 2021(TATOLI)—Membru kooperativa Kréditu Uniaun Rai Didi’ak ba Futuru (RADIFU), Victorino Barreto, aprende no hala’o atividade ne’e hodi dezenvolve moris.

“Ha’u hanesan membru ativu hosi RADIFU, ne’ebé durante sai membru ha’u kontente ohin loron ho empréstimu, ha’u bele dezenvolve hau-nia moris,” Membru kooperativa hateten iha salaun administrasaun munisipál, sábadu ne’e.

Nia haktuir, molok seidauk halo atividade kooperativa, nia hetan difikuldade finanseira.

“Ho atividade empréstimu hosi RADIFU, ha’u bele dezenvolve-an no iha Ainaro bele dehan ha’u fó ezemplu di’ak ba membru hotu tanba ha’u maka fó empréstimu barak liu,” nia akresenta.

Vitorino Barreto sente haksolok bele hala’o atividade kooperativa tanba lori mudansa ba nia moris, ne’ebé antes hahú atividade ne’e iha tinan 2013, nia rasik laiha fundu maibé ho esforsu bele susesu to’o agora.

Nia la sente iha dezafiu durante hala’o atividade ne’e tamba bele kolabora ho membru barak iha kooperativa ne’e.

“Jurus ne’ebé maka Kréditu Uniaun fó momentu ne’e 2%,” nia hatutan.

Osan empréstimu ne’ebé nia foti hodi loke farmásia no loja.

“Ha’u durante ne’e loke farmásia, klínika no loja iha Ainaro, liuhosi kréditu dezde tinan ualu ona. Ida-ne’e mak ha’u hateten katak liuhosi empréstimu sira ne’e bele dezenvolve ha’u nia moris no família sai di’ak liután. Se ha’u la kréditu, ha’u labele moris no dalan laiha atu ha’u bele buka osan,” Victorino subliña.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here