Bee-tudak Sina-Ira, Uailili, Baucau. Imajen Tatoli/Natalino Belo

BAUCAU, 10 jullu 2021 (TATOLI) – Grupu Juventude Kalma (Jokal), Aldeia Ledatame, Suku Uailili, Postu Administrativu Baucau Villa, Munisípiu Baucau, ne’ebé halibur juventude na’in-20 resin dezenvolve hola inisiativa dezenvolve bee-tudak Sina-Ira sai fatin turizmu komunitáriu.

Koordenadór grupu Jokal, Guido Carson Freitas, hateten ho fundus $20,00 hamosu inisiativa  halibur-malu hodi  dezenvolve Sina-Ira sai fatin turizmu hodi aproveita situasaun Estadu Emerjénsia no Serka Sanitária iha Munisípiu Baucau, mezmu implika ba sira difisil hetan rendimentu.

Bee-tudak Sina-Ira, Uailili, Baucau. Imajen Tatoli/Natalino Belo

“Fatin ne’e foufoun ema haree baibain, maibé ami haree bee ne’ebé furak, úniku mós iha Timor, tanba ne’e ha’u nu’udar juventude iha inisiativa halibur mós maluk juventude seluk atu kria fatin ne’e, tamba situasaun emerjénsia ita atu hetan osan arraska nune’e ami akumula malu dezenvolve fatin simples ne’e sai fatin turizmu komunitáriu,” Guido Carson Freitas hateten bainhira dada-lia ho Agência Tatoli iha área Sina-Ira,  sábadu ne’e.

Guido hatutan, fatin refere hahú dezenvolve no loke ba públiku iha loron 15 abríl 2021 no kuaze osan ne’ebé sira rekolla hamutuk $1.000-resin ona, maibé utiliza mós gastu operasionál kada loron entaun daudaun ne’e hela $700,00.

Bee-tudak Sina-Ira, Uailili, Baucau. Imajen Tatoli/Natalino Belo

Nia hateten, hahú dahuluk lansa ba públiku kuaze loron ida hetan $20,00, maibé tanba iklima udan fulan jullu laran loron ida mínimu $10,00 ne’ebé mak vizitante ida ho tinan 18 ba leten selu $0,50, enkuantu vizitante ho idade tinan 18 mai kraik $0,25.

“Laiha fundus, laiha ema atu suporta, ha’u nu’udar xefe iha tempu ne’ebá ho de’it $20,00 sosa pregu no tinta, ami joven rasik kriativa dezenvolve fatin ne’e,” Guido hateten.

Osan ne’ebé rekolla sei utiliza atividade bairru no suku nian inklui sei organiza loke torneiu.

Ho transporte hosi Baucau Villa ba Bee-tudak Sina-Ira, Uailili  presiza minutu 20 no bainhira to’o iha Uailili presiza la’o-ain metru 400 hodi to’o iha fatin destinasaun Sina-Ira.

Hanaran Sina-Ira tanba uluk koñesidu komunidade Xineza tempu okupasaun Portugés sempre hosi Baucau Villa antiga ba hariis iha fatin refere, nune’e komunidade inklui autoridade sira iha Uailili hanaran  bee-tudak ne’e Sina-Ira.

Presiza prepara kulinária produtu lokál

Hosi sorin seluk, vizitante Benvinda hosi villa antiga espresa nia kontente bainhira vizita fatin turizmu Sina-Ira no nia sujere atu iha fatin ne’e bele prepara mós kulinária produtu lokál.

“Ema balun hakarak hemu bee, jus, café, entaun di’ak liu dezenvolve tan halo mini kafé no prepara  hahán lokál. Nune’e, vizitante sira bele sosa hodi konsumu,”  Benvinda akresenta.

Nia hatutan, fatin Sina-Ira fresku no mós inklui sasán ne’ebé utiliza mesak lokál hanesan bambuu, uma -duut, flexible no fatin moos tuir nia natureza orijen.

Hatán ba sujestaun sira-ne’e koordenadór grupu Jokal, Guido Carson Freitas, hateten fatin Sina-Ira foin lansa ba públiku iha fulan tolu liubá, nune’e nia promete sei hadi’a di’ak liután inklui  prepara ai-han lokál no kafé ruma.

Jornalista       : Natalino Belo

Editor             : Francisco Simões

HAKEREK NO HATÁN

Please enter your comment!
Please enter your name here