Koordenadora UPMA, Brígida Soares. Imajen TATOLI/António Gonçalves

DILI, 09 jullu 2021 (TATOLI)—Relasiona ho elaborasaun Orsamentu Jerál Estadu (OJE) 2022, Unidade Planeamentu, Monitorizasaun no Avaliasaun (UPMA) hosi Gabinete Primeiru-Ministru (GPM) no Ministériu Finansa (MF) Diresaun Jerál Planeamentu no Orsamentu (DGPO, sigla portugés) husu atu instituisaun Estadu sira labele troka rekursu umanu iha planeamentu ne’ebé hatene ona lala’ok no nesesidade instituisaun.

“Husu ba liña ministériu no ajénsia autónomu labele troka ema planeamentu ne’ebé iha ona kuñesimentu ba área ida-ne’e atu labele prejudika preparasaun planu anuál 2022 iha entidade ne’e, husu mós departementu planeamentu iha kada entidade halo analize didi’ak, define meta ho loloos nune’e ajuda fasilita ezekusaun inklui rezultadu di’ak iha tinan oin,” Koordenadora UPMA, Brígida Soares, informa ba Agência TATOLI, iha ninia knaar fatin, Palásiu Governu, sesta ne’e.

Notísia relevante: UPMA: “atinjimentu meta sai fatór determina alokasaun orsamentu kada instituisaun”

Ba kestaun ne’e, entidade rua ne’e prontu ajuda entidade hirak ne’ebé presiza.

“Iha parte seluk, UPMA kontinua loke odamatan atu fó asisténsia karik entidade ne’ebé de’it persiza asisténsia ruma no UPMA kontinua koordena ho Ministériu Finansa hodi fasilita bele prepara planu di’ak ba tinan 2022,” nia akresenta.

Aleinde ne’e, UPMA iha atividade ida hanesan ‘efficiency review’ ka revista efisiénsia hodi fó informasaun ba entidade sira kona-ba dezafiu ne’ebé hasoru iha ezekusaun nia laran.

Notísia relevante: Ezekusaun reál OJE 2021 atinje 27% ho totál millaun $540,7

“Fó flexibilidadehalo alterasaun nesesáriu ba atividade ne’ebé mak labele implementa ho situasaun Estadu Emerjénsia no Serka Sanitária ne’ebé aplika,” nia hatutan.

Nune’e, UPMA sei kontinua fó apoiu tékniku ba entidade sira hotu hodi asegura sira bele ezekuta orsamentu ba programa no atividade ne’ebé hatuur ona, liuhosi monitorizasaun hanesan relatóriu trimestrál ne’ebé prodús no sei haruka filafali ba liña ministériu no ajénsia autónomu idaidak atu tau atensaun nafatin ba planu ezekusaun orsamentál ne’ebé hatuur ona iha dokumentu orsamentál (livru 2).

Biban ne’e, UPMA husu liña ministériu no ajénsia autónomu tenke jere ho di’ak hodi ezekuta tuir planu no hatudu rezultadu tuir meta ne’ebé sira trasa ona iha livru 2.

“Bainhira entidade sira la ezekuta bazeia ba meta ne’ebé hatuur ona, konserteza sei iha redusaun orsamentu ba atividade hirak ne’ebé mak la hatudu rezultadu di’ak,” Koordenadora UPMA fó subliña.

Tanba ne’e, iha preparasaun planu anuál tinan 2022, Governu kontinua orienta entidade relevante hodi forma estrutura prográmatika.

“Ita hotu aprende katak ho modelu orsamentu bazeia ba programa, ita tenke prepara planu ho kuidadu no di’ak tebes, ho ninia atividade ne’ebé iha ligasaun ba sub-program no programa ho ninia indikadór, base line no meta klaru,” nia fó hanoin.

Bainhira la planeia ho didi’ak no detallu maka entidade relevante sei hasoru dezafiu oioin iha faze ezekusaun.

“Ho nune’e, sujere atu liña ministériu no ajénsia autónomu halo planu asaun detallu molok prienxe ho meta kompletu no indikadór, hodi tau kustu ba atividade ida,” nia esklarese.

 Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here