Atividade iha sala plenária Parlamentu Nasionál. Imajen TATOLI/António Gonçalves.

DILI, 09 jullu 2021 (TATOLI)—Parlamentu Nasionál sei konstitui Komisaun Eventuál (KE) hodi halo revizaun ba estatutu deputadu sira no Lei Organizasaun no Funsionamentu Administrasaun Parlamentár (LOFAP).

“Ajenda kona-ba atu konstitui Komisaun Eventuál hodi halo revizaun ba Estatutu Deputadu sira, Lei Organizasaun no Funsionamentu Administrasaun Parlamentár no halo revizaun ba lejizlasaun lubuk ida tán,” Sekretária Meza Parlamentu Nasionál, Deputada Lídia Norberta dos Santos Martins, informa ba jornalista sira, iha uma fukun, sesta ne’e.

Nia dehan, revizaun ba lejizlasaun hirak-ne’e dezenvolve hela hosi Gabinete Sekretáriu Jerál no ekipa traballu sira.

Portavós Parlamentu Nasionál ne’e fó-sai katak, razaun atu halo revizaun ba lejizlasaun hirak-ne’e hodi atualiza tuir kondisaun atuál tanba lei hirak-ne’e eziste kleur ona, no Prezidente Parlamentu Nasionál hanoin katak tempu ona halo revizaun.

Objetivu prinsipál hosi estabelesimentu Komisaun Eventuál ne’e atu halo rezisaun ba Lei númeru 5/2004 kona-ba Estatudu Deputadu sira-nian, Lei Organizasaun no Funsionamentu Administrasaun Parlamentár (LOFAP) no Rejimentu Parlamentu Nasionál.

Lei númeru 5/2004 kona-ba estatudu deputadu sira aprova iha loron 10 marsu 2003 iha tempu Prezidente Parlamentu Nasionál Francisco Guterres ‘Lú Olo’ no promulga hosi Prezidente Repúblika Kay Rala Xanana Gusmão iha loron 15 abríl 2004.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here