Kondisaun estrada dirasaun rotunda merkadu Villa nova to’o Uainiki-Nagardjo, sesta (09/07). Imajen TATOLI/Natalino Belo

BAUCAU, 09 jullu 2021 (TATOLI)–Diretór Obra Públika munisípiu Baucau, Pedro Alexandre Guterres Pereira, submete proposta hadi’a estrada urbana rejiaun ne’e ba Governu sentrál no husu atu konsidera.

Diretór Obra Públika munisípiu Baucau, Pedro Alexandre Guterres Pereira. Imajen TATOLI/Natalino Belo

“Espera sira bele haree dezeñu, analiza, no hatama ba prosesu aprovizionamentu iha tinan ne’e hodi bele hadi’a hosi rotunda Villa nova to’o Nagardjo tamba estrada ne’e halo ona ema mate na’in-rua ona,” Diretór Obra Públika Baucau, informa ba Agência TATOLI, iha ninia knaar fatin, Villa nova, sesta ne’e.

Tuir Dekretu-Lei númeru 3/2016 16 marsu kona-ba Lei estatutu administrasaun munisipál, autoridade munisipál no grupu tékniku interministeriál ba Desentralizasaun Administrativa, mensiona katak estrada urbana sei responsabiliza hosi MOP nasionál.

Kondisaun estrada dirasaun rotunda merkadu Villa nova to’o Uainiki-Nagardjo, sesta (09/07). Imajen TATOLI/Natalino Belo

Nune’e, Obra Públika rejionál submete ona proposta ba Primeiru-Ministru, Taur Matan Ruak, Vise Primeiru-Ministru no Ministru Planu no Ordenamentu, José Maria dos Reis, Ministru Obra Públika, Salvador Eugênio Soares dos Reis Pires.

“Munisípiu ajuda halo dezeñu no Bill of Quantity (BoQ) hosi rotunda Villa nova, Planalto to’o Nagardjo hamutuk kilómetru 3,5, tanba ne’e dezeñu hotu ona ho estrada nia luan metru 6, trotoar sorin karuk-loos submete ona, maski kilómetru 23 la avansa maibé ida-ne’e tenki konsidera, ho totál orsamentu millaun $1 resin,” nia esplika.

Daudaun ne’e Obra Públika munisipál koordena hela ho Administradór postu Baucau Villa atu aloka osan hosi fundu Mão de Obra hamutuk $15.000 atu aterru rai mutin provizóriu ba estrada ne’ebé ne’ebé a’at, nune’e labele difikulta movimentu.

Kondisaun estrada dirasaun rotunda merkadu Villa nova to’o Uainiki-Nagardjo, sesta (09/07). Imajen TATOLI/Natalino Belo

“Ami koko koordena ho sira (Admistradór postu) atu aterru de’it rai mutin, maibé halo esforsu koordena mos ho Diresaun Obra Públika nasionál,” nia hatutan.

Tuir observasaun Agência TATOLI, nota katak kondisaun estrada dirasaun rotunda Villa nova merkadu to’o Uainiki Nagardjo, hetan estragu maka’as, maski sai sentru komérsiál no hanesan fatin movimentasaun transporte públika, iha loja, ospitál, estasaun kombustível, Kuartel Unidade Espesiál Polísia (UEP), no tuir planu futuru sei sai sentru edifísiu públiku.

Bazeia ba dokumentu orsamentál (livru 3) Orsamentu Jerál Estadu (OJE) 2021, aloka ba estrada urbana munisípiu Baucau pur volta millaun $11, ba reabilitasaun estrada ho distánsia kilómentru 23.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here