Restaurante lokál iha suku Aidabaleten, postu administrativu Atabae. Imajen Tatoli/Sérgio da Cruz.

BOBONARO, 09 jullu 2021 (TATOLI)—Durante implementasaun Serka Sanitária iha munisípiu Bobonaro, katupa iha restaurante lokál Erkina, suku Aidabaleten, postu administrativu Atabae, munisípiu Bobonaro la folin.

“Iha fulan hirak ba kotuk bainhira dalan taka, ema mós la mai sosa katupa. Dalaruma loron ida ami hetan de’it $5 tanba movimentu laiha duni. Katupa sira-ne’e to’o lorokraik mós la hotu,” na’in ba restaurante lokál, Lídia Loiola, hateten ba jornalista Agência Tatoli, iha suku Aidabaleten, sesta ne’e.

Notísia relevante:Populasaun Atabae seidauk asesu estrada

Lídia Loiola, hateten rendimentu restaurante lokál Erkina, depende liu ba ema ne’ebé hala’o viajen hosi Dili ba Maliana, maibé iha Serka Sanitária ne’e movimetu laiha, tanba ne’e rendimentu mós laiha.

Antee ne’e, loron ida dalaruma bele hetan to’o $60, tanba ema barak mak mai han katupa no ikan tunu saudável iha restaurante ne’e.

Iha fatin hanesan, na’in ba restaurante seluk, Ana de Jesus, hateten rendimentu ne’ebé laiha, difikulta sira mós atu responde nesesidade oan sira nian, liuliu nesesidade ba eskola nian.

Tanba ne’e sira agradese ba Governu ne’ebé fó ona fleksibilidade hodi loke dalan ba movimentu ema nian, liuliu sira ne’ebé kompleta ona vasina dalarua bele la’o ba mai, nune’e hein katak katupa bele folin ona.

Tuir observasaun, restaurante lokál barak mak provizoriamente taka tanba movimentu laiha.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here