Livru nia kapa oin. Imajen/Espesiál.

DILI, 09, jullu 2021 (TATOLI)—Diretór Ezekutivu Centro Nacional Chega (CNC), Hugo Maria Fernandes, hateten primeira-vez eskritór timor-oan ida hakerek livru istória Timor-Leste (TL) nian ne’ebé hakerek bazea ba estudu krítiku filozófiku ho teoria rekuñesimentu Axel Honneth nian.

Notísia Relevante: SEKOMS lansa livru “Politik Berdarah Timor-Leste” no “Lalehan Tanis”

Diretór Ezekutivu CNC, I.P, Hugo Maria Fernandes. Imajen TATOLI/Joanico de Araújo

“Ba dala uluk, ita foin lee livru istória Timor-Leste nian ne’ebé uza filózofu sira-nia pensamentu hodi halo análiza. Ida-ne’e ha’u hanoin pasu dahuluk ba timor-oan ida ne’ebé estuda filozofia,” Hugo Maria Fernandes hateten iha lansamentu livru “Politik Berdarah Timor-Leste” no “Lalehan Tanis” bainhira  halo apresiasaun ba livru rua refere, iha salaun Centro Nacional Chega, Antigu Komarka, Bailde, Dili, sesta ne’e.

Buat importante hosi livru “Politik Berdarah Timor-Leste” ne’e, nia dehan, mak konflitu entre partidu polítika iha 1974-1975 ne’e lori ema hotu-hotu ba hatene no aumenta rekoñesimentu.

Hugo Fernandes fó apresiasaun ba eskritór tanba eskritór la’ós halo análize hosi entrevista ba autór istória sira maibé obra ne’e maihosi retratu review ida (análize bibiliografia) ba livru sira-ne’ebé hakerek no publika ona.

Iha ne’e eskritór koko atu justifika de’it katak saida mak nia hakerek iha livru no teória saida mak Axel Honnet hateten, liuhosi esforsu barak mak foin halo leitura no halo intrepretasaun ba livru kona-ba istória Timor-Leste nian hosi eskritór seluk ne’ebé públika ona.

Entretantu Pe. Mateus Afonso hateten, filozofia mak siénsia hotu-hotu nia inan tanba hanesan eskritór hateten “Lalehan Tanis” ne’e tanba kriatura tomak nia inan. Se kriatura nia hahalok ladún di’ak karik ninia inan tanis no hanesan mós filozofia siénsia hotu-hotu nian, bainhira siénsia balun ladún loos ne’e karik filozofia tanis.

“Ha’u kontente, pela primeira vez tanba buat foun ne’ebé autór hakerek iha livru ne’e konflitu haree hosi prespetiva filozofia krítika nian. Relasiona ho krítika, dala barak ema la gosta krítika tanba mentalidade. Maibé ba ema rai-liur krítika ne’e hanesan siénsia no meu krítika ne’e barak hanesan drama no poezia ida,” nia hateten.

Nia apresia tanba eskritór foinsa’e ne’e konsege uza krítika filozofia hanesan pensamentu sira bele transmite hosi hakerek. Maibé hakerek ne’e la’ós buat fasil, maibé ho eskritór ninia esfrosu no dedikasaun hodi prodús livru ne’e sai matadalan ba jerasaun foun sira.

Eskritór Elidio Agusto Guterres hateten, iha prosesu produsaun livru ne’e nia halo análize uza konteudu teória rekoñesimentu tanba konflitu entre partidu polítika iha 1974-1975 ne’e laiha rekoñesimentu entre partidu no líder polítiku sira.

Tuir nia, filózofu Axel Honnet hateten atu rezolve konflitu tenke iha rekoñesimentu tolu (3) mak domin, legalidade no solidaridade, no kaer metin ba teoria Habermas ne’ebé hateten atu rezolve konflitu ne’e liuhosi komunikasaun, nune’e antes iha komunikasaun tenke iha rekoñesimentu.

“Livru Polítik Berdarah Timor-Leste ne’e, hanesan peskiza siéntifika ida-ne’ebé uza métodu kualitativu bibliografia,” nia dehan.

Livru “Politik Berdarah Timor-Leste” no “Lalehan Tanis” ne’e, nia hakerek iha Indonézia ho durasaun tinan ida-nia laran bainhira nia hala’o hela estudu maestradu nian iha Universitas Gajah Mada (UGM) Jogjakarta-Indonézia.

Jornalista : Osória Marques

Editór       : Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here