Serimónia entrega fundu hosi Embaisadór EUA iha Timor-Leste, Charles Kevin Blackstone ba Vise-Ministru Interiór, António Armindo. Imajen Media MI.

DILI, 09 jullu 2021 (TATOLI)—Estadu Unidu Amérika (EUA),  liuhosi Embaisada iha Dili, oferese tan rihun $900 ba Governu Timor-Leste  (TL), atu bele tulun vítima dezastre naturál, ne’ebé akontese iha 04 abríl.

Fundu ne’e oferese direta hosi Embaxadór  EUA iha TL, Kevin Blackstone, no simu hosi Vise Ministru Interiór (MI), António Armindo, iha edifísiu MI Vila Verde, sesta ne’e.

Notísia relevante:EUA sei kontribui millaun $17 ba Timor-Leste finansia área tolu

“Ami haksolok tebes tanba povu Amerikanu kontinua fó asisténsia adisionál ba toos na’in-sira iha TL perante situasaun kalamidade,’’ Kevin Blackstone, hateten iha diskursu.

EUA ofisialmente deklara tan apoiu ho montante rihun $900 ne’e atu apoia toos na’in-sira hodi kuda fila-fali fini iha toos ne’ebé hetan estragu hosi dezastre naturál.

Hosi montante orsamentu ne’e, EUA sei apoia fini hanesan modo, batar, hare no seluk tan ba agrikultór-sira iha munisípiu afetadu iha territóriu.

EUA sei ezekuta orsamentu ne’e liuhosi ajénsia internasionál USAID parseria World Vision TL, serbisu hamutuk ho Ministéiru Interiór liuhosi Sekretária Estadu Protesaun Sivíl (SEPS).

Objetivu hosi fornesimentu fundu ne’e, atu toos na’in-sira bele rekopera fila-fali sira-nia toos, hodi kolleta iha tempu tuir-mai no atu bele responde ekonomia uma laran no mós asegura seguransa ai-hán ba ema liu 15.000 iha fatin afetadu-sira.

Iha fatin hanesan, Vise-Ministru Interiór, António Armindo, agradese ba apoiu hosi EUA atu bele tulun família-sira iha situasaun difísil ne’e.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here