Ilustrasaun avaliasaun hakerek hosi alunu. Imajen/Nova Eskola

DILI, 09 jullu 2021 (TATOLI) – Totál eskola edukasaun pre-eskolár to’o Ensinu Sekundáriu Jerál Tékniku Vokasionál (ESTV) iha Dili purvolta 197. Maibé, eskola 76 de’it mak identifikadu iha ona kondisaun atu re-ativa prosesu ensinu aprendizajen aula prejensiál.

Notísia Relevante : 19 jullu, MEJD re-ativa ensinu aprendizajen prejensiál

Diretór Servisu Edukasaun Munisípiu Dili (SEMD) Duarte Bragansa, informa  dadus ne’ebé sira-nia parte simu hatudu katak vasinasaun bá profesór no estudante tinan 18 ba leten iha eskola 121 seidauk atinje 60%. Tanba ne’e, nia husu ba dirijente eskola hamutuk 121 atu semana rua nia laran bele submete ona dadus bá SEMD hodi bele update prosesu iha eskola refere.

“Ha’u relata ona informasaun bá Ministru Edukasaun kona-bá eskola 76 ninia preparasaun. Maibé ha’u hetan nafatin orientasaun atu update dadus iha eskola 121 ne’ebé seidauk kompletu atu ita bele buka alternativu hodi hetan lalais vasinasaun,” Duarte Bragansa, informa bá Agência Tatoli iha edifísiu Edukasaun, Dili, sesta ne’e.

Hosi sorin seluk, Diretór Eskola Ensinu Sekundáriu Jerál (ESJ), Nicolau Lobato, Marcos Soares Pacheco, hateten totál profesór iha nia eskola hamutuk 25; profesór 23 simu ona vasina no falta profesór na’in-rua (2) mak seidauk vasina tanba moras komplikadu.

Estudante ho idade tinan 18 bá leten hamutuk 500-resin, dadus estudante ne’ebé mak simu ona vasina foin mak estudante 50.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here