Ministru Asuntu Parlamentár no Komunikasaun Sosiál (MAPKOMS), Francisco Jerónimo. Imajen TATOLI/Egas Cristóvão

DILI, 09 jullu 2021 (TATOLI)- Ministériu ba asuntu Parlamentár no Komunikasaun Sosiál (MAPCOMS-sigla portugés), Francisco Jerónimo, esklarese katak programa dijitalizasaun Rádiu Televizaun Timor-Leste, Empreza Publika (RTTL,E.P) la iha intensaun polítika ruma, maibé Governu ajuda komunidade oinsá bele sai hosi situasaun plataforma analog ba fali dijitál.

Notísia Relevante : MAPCOMS halo sosializasaun kona-ba dijitalizasaun RTTL,E.P ba komunidade Laulara

Liuhosi divulgasaun ka sosializasaun dijitalizasaun RTTL,E.P iha Postu Administrativu Laulara, Munisípiu Aileu, Ministru Francisco Jerónimo, afirma programa ne’e implementa iha RTTL,E.P atu ajuda komunidade oinsá hato’o informasaun ne’ebé kredivel to’o baze.  Tanba ne’e, MAPCOMS husu ba komunidade Laulara koopera ho Governu bainhira ekipa ba estabelese dijitál transmisaun multimedia terrestre ka dijitál RTTL, E.P iha Laulara.

Nia hatutan, programa dijitál transmisaun RTTL,EP ne’ebé estabele iha Postu Administrativu Laulara ne’e tanba alvu ikus liuhosi programa ne’e, maka komunidade hotu-hotu tenke asesu programa dijitalizasaun  ne’e rasik, nune’e agora tama ba faze ida atu halo instalasaun Set Top Box (STB) ba uma-kain sira, hosi STB mak pakote ne’ebé hanesan, antena, receiver no fiu.

“Ita hakarak muda sistema plataforma analog ba fali dijitál tanba ita-nia televizaun RTTL,E.P nia transmisaun ne’ebé dala ruma fallansu ho imajen sira ne’e tanba ita-nia sistema ne’e sei analog tanba ne’e agora atu muda fali ba dijitál nune’e bele fó kualidade transmisaun ba públiku,” Ministru Francisco Jerónimo hateten.

Iha sosializasaun programa dijitalizasaun ne’e Administradór Munisípiu Aileu, Abel da Conceição, agradese tebes ba Governu tanba bele halo sosializasaun dijitalizasaun ba komunidade oinsá bele hatene lala’ok kona-ba programa dijitalizasaun.

“Ami-nia munisípiu hetan oportunidade kona-ba sosializasaun dijitalizasaun ne’e, ami agradese tebes, ami sei koopera ho Governu nune’e programa ida-ne’e la’o di’ak iha ami-nia munisípiu,” Abel da Conceição  hateten.

Asesór MAPCOMS, Graciano dos Santos, liuhosi sosializasaun ne’e hateten, sosializasaun ne’ebé ohin hala’o ona semana oin ekipa tékniku sei fila-fali ba Postu Administrative Laulara hodi rekolla dadus komunidade ne’ebé iha televizaun rejistu hotu mak foin lori sasán STB ba monta iha komunidade ida-ida nia uma.

Nia hatutan, daudaun sira parte sei haree uluk ba komunidade ne’ebé iha televizaun ajuda monta antena dijitál nian, no ba sira ne’ebé seidauk iha televizaun sei hetan oportunidade tuir mai.

Material STB ne’ebé daudaun ne’e prepara ona atu distribui ba komunidade iha Postu Administrativu Laulara hamutuk 750 ba uma-kain 750.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here