Ministru Edukasaun Juventude no Desportu, Armindo Maia. Imajen Tatoli/Egas Cristovão

DILI, 09 jullu 2021 (TATOLI) – Destinu ajente administrasaun públiku na’in-93 iha Ministériu Edukasaun, Juventude no Desportu (MEJD) to’o agora seidauk hetan kontratu tanba presiza desizaun Konsellu Ministru.

Ministru Edukasaun Juventude no Desportu (MEJD), Armindo Maia hateten, nia parte deside lori prosesu funsionáriu ajente administrasaun públiku na’in-93 ba KM tanba hakarak hetan desizaun ida forte liután.

Nia esplika razaun importante Ministru nian la foti desizaun mesak maibé tenke aprezenta asuntu ne’e ba KM tanba prosesu rekrutamentu la’ós halo iha ninia tempu.

“Ami presiza hetan desizaun hosi KM tanba prosesu rekrutamentu ne’e halo la’ós iha ami nia tempu, maibé iha tempu ministra sesante nian. Tan ne’e, KM tenke hetan koñesimentu hodi bele foti desizaun ruma,” Ministru Armindo Maia informa ba jornalista iha Sentru Integradu Jestaun Krize (SIJK), foin lalais ne’e.

Hosi sorin seluk Diretora Nasionál Forsa Traballu no Mobilidade Funsaun Públika- Sekretariadu Komisaun Funsaun Públika (DNFTMFP-SKFP), Anita Tavares Ribeiro de Jesus, klarifika katak prosesu rekrutamentu bá ajente administrasaun públiku na’in-93 ne’e hetan koñesimentu tanba simu proposta. Maibé proposta ne’e, Ministériu Edukasaun husu atu delega kompeténsia hodi bele hala’o prosesu rekrutamentu ne’e.

Relatóriu final bá prosesu rekrutamentu DNFTMFP simu mós relatóriu hosi MEJD maibé númeru de’it, ema se-se mak sira rekruta la mensiona ne’ebé KFP laiha kompeténsia atu ko’alia liu kona-bá lala’ok prosesu rekrutamentu ne’e.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here