Armazén ai-moruk SAMES. Imajen Tatoli/António Gonçalves.

DILI, 09 jullu 2021 (TATOLI)—Diretór Ezekutivu Serbisu Autónomu Medikamentu no Ekipamentu Saúde (SAMES), Santana Martins, informa totál item ai-moruk iha armazen sentrál hamutuk 326, no oras-ne’e daudaun item 42 mak estoke mamuk.

“Ita-nia estoke medikamentu ne’ebé iha armazem hosi totál item 326 ne’ebé ami kapta iha sistema, no hosi totál ida-ne’e iha item 284 mak daudaun ne’e sei disponível ka 87% no estoke ne’ebé laiha item 42 ka 13%,’’ Santana Martins, hateten ba Tatoli, sesta ne’e.

Notísia relevante:MS sei apoia rekursu umanu iha SAMES

Hosi totál item hirak-ne’e, iha item balun ne’ebé esensiál tebes no tama iha kategoria  estoke out hanesan Clopidogrel 75mg tabs, Cloxacilin Sodium  oral Suspension  125mg/5ml/Bot/100ml, Glyceryl Trinitrate, Injection 600mcg/2ml/Amp/2ml, Hydrocortisone Sodium Succinate Injection 100mg vial, Magnesium Sulphate 500mg/ml (50%) vial /10ml.

Item sira ne’ebé estoke mamuk no temi iha leten, ne’e esensiál tebes tanba ne’e ai-moruk ba inan isin-rua ne’ebé mak atu partus inklui ai-moruk fuan nian.

“Tanba ne’e mak oras-ne’e daudaun ami halo hela esforsu  atu banihira mak lori item sira ne’e mai,” nia haktuir.

Esforsu ne’e katak, prosesu aprovizionamentu farmasiotika ne’ebé  ajudika  ona ka kontrata ona kompaña-sira, maibé prosesu deliberasaun mak sei presiza tempu.

Kompaña-sira ne’ebé durante ne’e SAMES halo kontratu maihosi Austrália, Portug’al, Olanda, Indonézia, Singapura no India.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here