Imunizasaun COVID-19 iha Sentru saúde Atabae, sesta (09/07/21). Imajen Tatoli/Sérgio da Cruz.

BOBONARO, 09 jullu 2021 (TATOLI)—Abitante postu administrativu Atabae, munisípiu Bobonaro na’in 1.164, simu ona vasina AstraZeneca doze dahuluk no doze daruak.

“Iha doze dahuluk ne’e pesoál liña frente na’in 113. Agora kompleta tan ona doze daruak, konta hamutuk ho ne’ebé  idade 60 ba leten no komorbilidade hamutuk na’in 1.164. Ita kontinua la’o nafatin ba komunidade ne’ebé sai tarjetu,” Xefe Sentru saúde Atabae, Filomeno Pirez, hateten ba jornalista  Agência Tatoli, iha kna’ar-fatin, sesta ne’e.

Notísia relevante: Populasaun Atabae seidauk asesu estrada

Tuir tarjetu, Sentru saúde Atabae iha faze daruak, doze dahuluk fó ba ema na’in 1000-resin, maibé iha implementasaun la konsege atinji alvu, tanba ema ho idade 60 ba leten no komorbilidade ladún partispa, entaun pesoál saúde tenke fó fali ba ema ne’ebé ho voluntariamente mai hakarak simu vasina.

Sentru saúde Atabae observa katak, populasaun Atabae durante ne’e entusiazmu atu simu vasina, maibé hafoin rona informasaun Inan faluk Hilária de Jesus hakotu-iss hafoin simu vasina AstraZeneca iha suku Lour, postu administrativu Bobonaro, komunidade pániku no ladún partisipa.

Komunidade, Maria Santina husu ba komunidade ne’ebé seidauk vasina, atu ba diretamente simu, nune’e bele aumenta imunidade isin hodi halo prevensaun no luta kontra COVID-19.

Pesoal saúde iha sentru saude Atabae, nafatin esforsu atu kontinua implementa programa vasina ne’e, bainhira komunidade sira hakarak voluntariumente simu.

Alende ne’e, sei halo mós sensiblizasaun no promosaun kona-bá importánsia hosi vasina AstraZeneca tuir regra Organizasaun Mundiál Saúde (OMS).

Totál pesoál saúde ne’ebé destaka iha programa vasina hamutuk na’in 30, inklui tékniku aliadu-sira.

Foin lalais ne’e, sentru saúde Atabae simu tán vasina AstraZeneca  vial 65, atu oferese tuir tarjetu ne’ebé tékniku-sira enumera.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here