Universidade Nasionál Timor Lorosa'e (UNTL) troka nota kooperasaun ho Asosiasaun TANE Konsumedór iha salaun audiotórium UNTL, kinta (08/07). Imajen Tatoli/Francisco Sony

DILI, 08 jullu 2021 (TATOLI)-Asosiasaun TANE Konsumidór, kinta ne’e, estabelese kooperasaun ho Universidade Nasionál Timor Lorosa’e (UNTL) kona-bá  kontinuidade estájiu estudante Fakuldade Siénsia Sosiál, Departamentu Komunikasaun Sosiál  iha TANE Konsumidór.

Objetivu hosi asina akordu ne’e sei fó biban ba estudante-sira hodi bele hala’o atividade sientífika, akadémika no téknika iha TANE Konsumidór hodi bele hakle’an sira-nia koñesimentu kona-ba matéria sira ne’ebé ligadu ba Lei hodi fó protesaun ba konsumidór no akompaña kazu prátiku sira ne’ebé TANE nia sentru apoiu ba konsumidór.

Prezidente TANE Konsumidór, António Ramos da Silva hateten, durante estudante sira hosi UNTL hala’o estájiu iha TANE Konsumidór hamutuk na’in-haat, ne’ebé atividade TANE Konsumidór no estudante  hala’o mak hanesan, haree kualidade sasán no folin sasán, atu fornese ba konsumidór sira ho metodolojia ne’ebé estudante UNTL sira no TANE Konsumidór halo.

“Esperansa hosi TANE Konsumidór nian ba oin mak ami-nia avaliasaun katak ita-nia universidade mós iha ninia formasaun ne’ebé kualidade, entaun ami kolabora nafatin fornese lei direitu konsumu nian ba estudante sira bainhira hala’o estájiu,” António Ramos da Silva hateten

Reitór UNTL, João Soares Martins, iha biban ne’e mós hateten UNTL agradese tebes ba TANE Konsumidór tanba hili ona UNTL sai hanesan parseiru importante ida no servisu barak estudante UNTL hamutuk ho TANE  Konsumidór hala’o tiha ona.

Ami kontente tebes tanba TANE utiliza ona rekursu UNTL nian, liu-liu Fakuldade Komunikasaun Sosiál ne’ebé mak ajuda tebes sira-nia programa balu direitu konsumidór tanba direitu konsumidór ne’e importante tebes liga ba asegura saúde públika,” João Soares Martins hateten.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here