Diretór Sentru Formasaun Sitech Center, Agostinho Marques Ximenes. Imajen Tatoli/Nelia Fernandes.

DILI, 08 jullu 2021 (TATOLI)—Sentru Formasaun Sitech Center (SC) kapasita timor-oan sira iha área enjeñaria, nune’e bele dezenvolve programa rasik no halo serbisu mesak.

Diretór Sentru Formasaun Sitech Center, Agostinho Marques Ximenes, hateten sentru ne’e fó formasaun ba joven sira iha área enjeñaria, hodi apoia Governu liuhosi Ministériu Edukasaun Juventude no Desportu (MEJD) iha área edukasaun.

“Hakarak atu ajuda maluk timor-oan sira ne’ebé defísil liu iha área enjeñaria nian tanba Timor iha área enjeñaria ne’e fraku liu, nune’e bele ajuda parte edukasaun no parte prepara rekursu umanu nasaun nian,” Agostinho Marques Ximenes informa ba Agência Tatoli, iha nia kna’ar-fatin, Quintal Boot, Dili, kinta ne’e.

Sentru Formasaun Sitech Center ne’e harii iha 2015 no funda hosi ema na’in-tolu inklui Agostinho Marques Ximenes.

Nia haktuir, atividade formasaun ne’e la’o dezde 2018 maibé to’o 2019 paradu tiha tanba nia ba kontinua iha 2019 no oras ne’e hahú fali formasaun

Sentru Formasaun Sitech Center ne’e foka liubá área enjeñaria hanesan konstrusaun sivíl, arsitek, informátika (IT) no administrasaun.

“Iha administrasaun ita foka liu ba téknolojia tanba haree iha ita-nia rai Timor fraku iha ne’e, entaun ita mós hakarak ajuda iha parte administrasaun nian. Kkatak, uza téknolojia atubele hala’o serbisu ho lalais liu,” nia dehan.

Nia esplika, matéria ne’ebé aplika formandu sira iha área enjeñaria mak hanesan konstrusaun sivíl, arsitek, sentru ne’e hanorin oinsá dezeñu uma, halo infraestrutura oinsá, dezeñu infraestrutura, aprende Bill of Quantity (BOQ) iha infraestutura nian.

Purtantu iha tipu formasaun Informátika Teknolojia (IT) nian hanesan kria sistema rasik, halo programa rasik no aprende serbisu ho ekipa.

Entretantu, totál formandu iha sentru formasaun ne’e hamutuk rihun-lima-resin no hosi númeru ne’e 20%-resin mak hetan ona serbisu iha instituisaun Governu, Organizasaun Naun-Govermantál (ONG) no balun kontinua sira-nia estudu.

Nia haktuir, sentru formasaun ne’e hahú iha fulan-janeiru 2021, maibé to’o marsu atividade paradu tiha, tanba COVID-19, maibé daudaun ne’e reativa fali ona iha fulan-juñu.

Maske reativa hikas atividade formasaun maibé kumpre nafatin protokolu hosi Ministériu Saúde no Organizasaun Mundiál Saúde.

Totál funsionáriu iha sentru ne’e hamutuk ema na’in 15 kompostu funsionáriu na’in-ida no formadór na’in 14, formadór hirak-ne’e timoroan no ema estranjeiru na’in-ida.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here