Diretór Ezekutivu FONGTIL, Daniel Santos do Carmo. Imajen Tatoli/Egas Cristovão

DILI, 08 jullu 2021 (TATOLI)—Forum Organizaun Naun Governamentál Timor-Leste (FONGTIL) hato’o submisaun ba Komisaun C ne’ebé trata asuntu Finansa Públika konsidera proposta Lei Enkuadramentu Orsamentál (LEO) ne’ebé atu subtitui Lei Orsamentu no Jestaun Finanseira (LOGF-sigla portugés) bele prezudika dezenvolvimentu nasionál.

Diretór Ezekutivu FONGTIL, Daniel Santos do Carmo, esplika VIII Governu Konstitusionál elabora esbosu Lei Enkuadramentu OJE no Jestaun Finaseira Públika ho objetivu revoga Lei númeru 13/2009, 21 outubru  kona-ba Orsamentu no Jestaun Finanseira. No revogasaun refere VIII Governu propoin ho razaun katak, alterasaun ba Lei 13/2009, 21 outubru hodi responde limitasaun ne’ebé lei refere iha.

Ein-prinsípiu FONGTIL deskorda ka la aseita ho revogasaun refere bazea ba opiniaun jurídiku balun.

Paresér hosi FONGTL ne’e hateten, karik iha limitasaun hanesan VIII Governu deklara iha introdusaun hosi esbosu ba lei foun refere, mosu pergunta ba FONGTIL oinsá Lei númeru 13/2009, 21 outubru bele eziste ka vigora kuaze tinan sanulu resin rua (12), hahú hosi tinan 2009 to’o 2021.

“FONGTIL konsidera esbosu Lei Enkuadramentu OJE no Jestaun Finanseira Públika halakon karáter hosi lei ne’e rasik hanesan; kesik, obriga no kumpre. Esbosu lei foun ne’ebé iha fleksibel liu no FONGTIL fiar ho fleksibilidade ne’ebé iha lei refere, bele konvida aktu krime ba ezekusaun OJE (korrupsaun), ho razaun kuaze artigu hirak-ne’ebé konsidera hanesan pesso hodi fortifika seguransa ba ezekusaun OJE elimina hotu hosi lei númeru 13/2009, 21 outubru, no polítika ida-ne’e bele prezudika dezevolvimentu nasionál ba Timor-Leste,” paresér hosi FONGTIL ne’ebé Agência TATOLI asesu hosi Parlamentu Nasionál, kinta ne’e.

FONGTIL identifika varias defisiénsia jurídiku balun hosi esbosu lei foun refere ne’ebé prepara hosi VIII Governu Konstitusionál, iha artigu balun konsidera hanesan alisersu hodi fortifika seguransa ba pozisaun OJE refere kuaze elimina.

Artigu hirak-ne’e FONGTIL sita ho pontu haat:

  1. Artigu 38 númeru 1 hosi lei númeru 13/2009, 21 outubru, ko’alia klaru katak, kompeténsia halo alterasaun no tranferénsia orsamentu ne’ebé la dispoin ba Autonomia Administrativa Finanseira ba kada ministériu ka sekretaria estadu labele liu 20%, maibé artigu refere subtitui ho artigu 96 hosi esbosu lei foun Enkuadramentu ba OJE no Jestaun Finanseira Públika, la hakerek númeru serteza hosi presentajen.

“FONGTIL haree katak, ezisténsia artigu 96 hosi esbosu lei Enkuadramentu ba OJE no Jestaun Finanseira Públika, konsidera vulnerável tebes hodi asegura ezekusaun OJE ho razaun, Governu (Ministériu sira ka Ministériu Finansa) bele sabotaje ba ezekusaun OJE, hanesan halo levantamentu orsamentu la tuir sasukat balun tanba laiha númeru serteza. FONGTIL ejize númeru hosi presentajen ne’e tenke nafatin mensiona hodi nunee ministériu sira labele komete aktu krime tanba aproveita fleksibilidade ne’ebé artigu refere impoin,” refere paresér hosi FONGTIL.

  1. Artigu 51 númeru 3 no 5 hosi esbosu Lei Enkuadramentu ba OJE no Jestaun Finanseira Públika, koloka Unidade Planeamentu, Monitorizasaun no Avaliasaun (UPMA) ho kualidade hanesan ministériu prinsipál, ne’ebé ninia kna’ar avalia no rezeita planu OJE ne’ebé elabora hosi kada ministériu, karik OJE ne’ebé elabora ona la aliña ho Planu Aasaun Anuál ne’ebé iha OJE sei rezeita.

FONGTIL halo análize katak, Ministériu Finansa lakon ninia kualidade nu’udar ministériu prinsipál, ne’ebé normalmente prezide no organiza pre-plenária hodi deskute OJE iha nível órgaun ezekutivu, antes lori OJE iha nível Governu ba Parlamentu Nasionál hodi debate iha plenária.

Tanba artigu 51 númeru 3 no 5 konsidera nu’udar artigu frajil ne’ebé minimiza kualidade serbisu hosi Ministériu Finansa ho razaun, Ministériu Finansa labele organiza ninia papél ka devér ho di’ak.

FONGTIL rezeita maka’as karik artigu refere dezeña ho razaun garante transparénsia no akuntabilidade ba prosesu OJE.

OJE ne’ebé elabora hosi kada ministériu tenke liuhosi prosesu avaliasaun ne’ebé adekuadu no duru hosi Ministériu Finansa, ne’ebé refleta ba prestasaun serbisu intermu ezekusaun Planu Asaun Annual no OJE anteriór.

  1. Artigu 57 hosi esbosu lei foun enkuadramentu OJE no Jestaun Finanseira Públika, ne’ebé hasai tiha kualidade orijin hosi duodésimu no hatuur natureza duodésimu hanesan ho OJE.

“FONGTIL hanoin katak, polítika ida-ne’e la kondiz ho prinsípiu OJE ho razaun, duodésimu hanesan fundu auxiliar ne’ebé únika aplika ka implementa bainhira OJE seidauk obter lejitimidade ba ninia ezekusaun, ne’eduni proibidu tebes ba VIII Governu hodi konverte natureza duodésimu nakfilak ba ámbitu komún,” FONGTIL kestiona liuhosi submisaun paresér ba PN.

  1. Artigu 30 hosi esbosu lei foun Enkuadramentu OJE no Jestaun Finanseira Públika, ne’ebé ko’alia katak, RAEOA goza autonomia finanseira alargada no orsamentu autonomia ne’ebé integradu ho OJE.

Maibé bazea ba artigu 5 númeru 3 hosi Konstituisaun RDTL no Lei númeru 3/2014, 18 juñu, aprova estatutu Rejiaun Espesiál no Zona Ekonómia Espesiál ba Oé-Cusse Ambeno no Ataúro.

FONGTIL hanoin katak, loos duni juri RAEOA hetan previleiju hosi lei rua (2) ne’e, maibé defaktu RAEOA seidauk kumprimenta prosedimentu balun ne’ebé iha, to’o oras ne’e seidauk estabelese kámara munisipál ne’ebé ke konsidera hanesan órgaun lejizlativu hala’o ninia papél iha asuntu lejizlasaun no fiskalizasaun ba Rejiaun Administrativa Espesiál.

“Ne’e duni FONGTIL hanoin katak, natureza orsamentu RAEOA ninian la presiza separa ho munisípiu seluk ne’ebé enkaixa iha Ministériu Administrasaun Estatal (MAE), hodi nune’e bele kontrola hosi nasionál. Tanba se laiha kámara munisipál konserteza Autoridade RAEOA sei iha dupla funsaun hanesan ezekutór no fiskalizadór (Check and Balance) ba OJE ne’ebé dirije ba RAEOA,” FONGTIL preokupa iha sira-nia paresér ba proposta LEO ne’e.

Ikus liu, Paresér ne’ebé asina hosi Diretór Ezekutivu FONGTIL klarifika, objetivu hosi submisaun ne’e hanesan kontribuisaun hosi parte FONGTIL ba dezenvolvimentu nasionál liuhosi órgaun lejizlativu ba asuntu reforma lejizlativa. FONGTIL nia submisaun ne’e laiha intensaun atu minimiza morál ka polítika VIII Governu Konstitusionál nian.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here