Forum ONG Timor-Leste (FONGTIL) halo konferensia imprensa kona-ba monitorizasaun ba preparasun Orsamentu Jerál Estadu (OJE) 2022 iha salaun FONGTIL, kinta (08/07). Imajen Tatoli/Francisco Sony

DILI, 08 jullu 2021 (TATOLI)-Rede sosiedade sivíl fó apresiasaun ba Parlamentu Nasionál no Governu ne’ebé aloka tokon $1.5 ba atividade sosiál  iha polítika Orsamentu Jerál  Estadu (OJE) 2022.

Diretór Ezekutivu Forum Organizasaun Naun Governamentál Timor-Leste (FONGTIL), Daniel Santos do Carmo, hateten, sosiedade sivíl fó apresiasaun ba Governu tanba OJE 2022 Governu tau ona orsamentu boot ba programa sosiál hanesan iha área kapitál sosiál, (Edukasaun, formasaun profisionál no saúde) abitasaun, inkluzaun sosiál, setór produtivu (Agrikultura, Turizmu, Ambiente no konetividade), dezenvolvimentu setór privadu, dezenvolvimentu rurál no Governasaun.

“Ita apresia tebes ba sinseridade Governu nian ne’ebé mai duni ho fundamentu kapasidade iha analiza kontestuál no analiza Timor-Leste nian ne’ebé mai duni ho fundamentu identifika setór prioritáriu ne’ebé foku duni ba nesesidade no dezafiu povu no ba sustentabilidade Timor-Leste nu’udár Estadu,” Daniel Santos do Carmo hateten liuhosi konferénsia imprensa, kinta ne’e, iha edifísiu FONGTIL, Dili.

Ho orsamentu tokon $1.5 ne’ebé Governu tau ona iha sosiál ne’e fiar katak ho definisaun programa prioridade nasionál ba tinan fiskál 2022, sei tulun atu hadi’a edukasaun iha nia asesu no nia kualidade.

Nia dehan, hosi surtu COVID-19 ne’e halo timor-oan sira labele hetan oportunidade di’ak liu atu dezenvolve sira-nia koñesimentu no abilidade. Tanba ne’e, programa prioridade iha OJE 2022, sei tulun timor-oan sira atu asesu ba prestasaun servisu ne’ebé di’ak no besik iha sira-nia hela fatin.

Kona-ba aspetu bee-moos, saneamentu, sei tulun família sira atu asesu ba bee-moos ne’ebé seguru no sustentável liuhosi hadi’a infraestrutura bee-moos no saneamentu hodi garante distribuisaun bee-moos ba ema hotu.

Koordenadór TLCE, José Monteiro dehan, kona-ba OJE 2022 kompara antes ne’e la’ós Governu la’u tau importánsia, maibé ba OJE 2022 nian hakarak atu husu di’ak liután Governu nia konsentrasaun no kompromisu Governu nian ba polítika prioritáriu sira rasik tau nune’e alokasaun OJE 2022 nafatin konsidera prioridade sira-ne’e.

“Ita labele ko’alia de’it dehan kapitál sosiál prioridade, maibé hafoin ida ne’e orsamentu ba fali infraestrutura mak prioridade, entaun ho situasaun sira-ne’e ita hakarak atu ita-nia Governu konsisténsia ho sira-nia polítika bele kontinua hadi’a povu nia moris no uza COVID-19 no inundasaun sai hanesan referénsia,” José Monteiro tenik.

Koordenadór HASATIL, Gil Horácio Boavida, dehan, planu ne’ebé Governu tau ona iha OJE 2022 daudaun ne’e sosiedade sivíl fó ona apresiasaun, maibé sosiedade sivíl la’ós fó apresiasaun hotu husik de’it, maibé bainhira iha implementasaun no alokasaun orsamentu ne’e sosiedade sivíl sei akompaña nafatin prosesu sira-ne’e.

“Atu nune’e ita bele hatene katak iha planu orsamentu ne’e prioridade tau atu alokasaun ne’e reál duni ba problema xave ne’ebé sai dezafiu ba agrikultura ne’e,” nia afirma.

Nia afirma tan, OJE  presiza halo balansu kalkulasaun ho reál ba planu orsamentu 2022, tanba anteriór ne’e parte agrikultura, infraestrutura sai dezafiu boot ba iha produsaun jestaun rekursu lokál hanesan bee-moos sai hanesan problema boot ida ba dezenvolvimentu agrikultura.

Rede servisu sira ne’ebé ohin hamutuk ho FONGTIL halo konferénsia imprensa ne’e mak hanesan, Rede Feto Timor-Leste, Timor-Leste Coalition For Education (TLCE), Plataforma Nasionál BESI Timor-Leste no Hametin Agrikultura Sustentável Timor-Leste (HASATIL).

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here