Diretór Obra Públika munisípiu Baucau, Pedro Alexandre Guterres Pereira. Imajen TATOLI/Natalino Belo

BAUCAU, 08 jullu 2021 (TATOLI)–Diretór Obra Públika munisípiu Baucau, Pedro Alexandre Guterres Pereira, hateten, kompañia hahú submete proposta ba konkursu reabilita Estrada Rurál ba Dezenvolvimentu (ERD) pakote hitu iha munisípiu tolu.

“Kompañia lubun mak submete dokumentu ba projetu pakote hitu, ne’ebé pakote ida kompañia neen mak tuir hosi Baucau, Viqueque no Lautém,” Diretór informa iha ninia knaar fatin, Villa nova, kinta ne’e.

Notísia relevante: MOP-DNA anunsia vensedór projetu estrada rurál Lautém pakote haat

Obra Públika rejionál ho prezensa hosi Komisaun Nasionál Aprovizionamentu (CNA, sigla portugés) halo avaliasaun dokumentu hodi haree parte administrativa no kestaun téknika, tanba projetu ne’e finansia hosi fundu infraestrutura tinan 2021 ho valór kada projetu $15.000 ba leten.

Antes atu implementa projetu, liuhosi faze submete dokumentu, sei iha avaliasaun hosi CNA durante loron 90 laran hodi deside kompañia manán-na’in, ho durasaun tempu serbisu tinan ida.

Pakote hitu kompostu hosi Baucau pakote haat hanesan suku Afasa-uaitame, postu administrativu Quelicai ho distánsia kilómetru 3 to’o 6, Afasa-Uaitame kilómetru 6 to’o 9 no Afasa-Uaitame kilómetru 9 to’o 12, postu Venilale-Uaioli ho distánsia kilómetru 0 to’o 3, Viqueque iha pakote rua no Lautém pakote ida.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here