Administradór Hospitál Referál RAEOA, Manuel da Cunha. Imajen Tatoli/Abilio Elo Nini.

OÉ-CUSSE, 08 jullu 2021 (TATOLI)–Administradór Hospitál Referál Rejiaun Administrativa Espesiál Oé-Cusse (RAEOA), Manuel da Cunha, relata hosi fulan-janeiru to’o juñu Hospitál Referál RAEOA rejista kazu morás 10 maibé moras ne’ebé aas liu mak hipertensaun hamutuk na’in-770.

“Hospitál Referál RAEOA rejista morás 10 maibé moras ida-ne’ebé aas liu iha RAEOA ne’’e mak hipertensaun ho totál hamutuk 770,” Manuel da Cunha informa ba Agência Tatoli iha nia servisu fatin, Pante Makasar, Oé-Cusse, kinta ne’e

Moras seluk ne’ebé hospital referál rejista mak Infesaun Respiratóriu Aguda (IRA) 737, Gastritis 422, Sindrome Febrile Aguda (SFA) 402, Rinofaringitis 314, Dermatitis 297, Diarea 221, Traumatizmu 101, infeksaun Urinaria Tract 85 no Sacrolumbalgia hamutuk 83.

Maske iha situasaun COVID-19 maibé moras seluk mós eziste nafatin, entaun Hospitál Referál Oé-Cusse rejista kazu morás 10 ne’e mak sai prioridade atu Ministériu Saúde tenke tau iha konsiderasaun.

“Tanba saida mak iha hospitál referral, ita tau atensaun nafatin ba morás hirak ne’e. Tanba, morás hirak iha leten ne’e sempre akontese ba komunidade sira. Moras hipertensaun ne’e halo ema barak sai stroke (la’o la normal). Klaru ami iha unidade ida rezolve fisioterapia maibé iha limitasaun ba ekipamentu. Ema iha maibé ekipamentu mak seidauk fornese tuir kategoria ne’ebé mak iha,” nia esplika.

Moras hipertensaun kona ema tanba ema-nia hahalok mós bele kontribui hanesan hemu tua beibeik, hemu kafé, konsumu mina-tein barakliu no dalaruma mós hanoin barak ka moris iha presaun (stress) nia laran bele halo ema stroke.

Daudaun ne’e ema hotu preokupa ba morás COVID-19 maibé iha hospital referál ne’e iha dirasaun rua mak iha responsabilidade másimu atu hamatan ba moras sira seluk ne’e mak dirasaun servisu saúde rejionál kompostu hosi sentru saúde no postu saúde ne’ebé kategoria nu’udár servisu primaria ninian.

Dirasaun seluk mak Dirasaun Hospitál Referál ninia ne’ebé servisu atu garantia kualidade servisu ne’ebé kategória hanesan servisu sekúndaria mak hanesan bainhira pasiente ida tama no halo tratamentu saúde hospital, persiza deskansa (toba) hodi hasai raan kompletu no seluk tán.

Pesoál saúde sira iha sentru no postu saúde rejoinál no iha hospitál referral, nafatin tau atensaun ba moras sira seluk no husu ba komunidade iha RAEOA labele hanoin de’it morás COVID-19, maibé persiza mós prevene-an hosi morás seluk ne’ebé mak hospitál referál rejista.

“Ami-nia preokupasaun mak ne’e. Bainhira ita la-tau atensaun no konsiderasaun másimu ba morás seluk, entaun susár tebes. Tanba, RAEOA kuandu hetan morás grave ruma refere ba nasionál ne’e, susár atu hetan transporte ho lais,” nia dehan.

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here