Sekretáriu Estadu Juventude no Desportu, Abrão Saldanha. Imajen TATOLI/Egas Cristovão

DILI, 07 jullu 2021 (TATOLI) – Governu Korea do Sul sei apoiu Governu Timor-Leste valor orsamentu tokon $6.5  hodi harii sentru nasionál futeból ida iha Becora, Dili.

“Korea sei ajuda ita hodi harii sentru ida ba futeból nian sei hala’o eis kampu Kulau, Becora, Dili. Projetu ne’e hahú tinan oin tanba tinan ne’e sei iha faze konkursu,” Sekretáriu Estadu Juventude no Desportu (SEJD),  Abrão Saldanha ba Agência Tatoli iha edifisiu SEJD, Dili, foin lalais  ne’e.

Nia dehan, sentru ne’ebé sei harii inklui ho dormitóriu atu bele halo selesaun ba jogadór sira hosi munisipiu sei hatama iha asrama refere.

“Ida-ne’e ita mós aproveita hodi estimula liga juveníl sira, atu ita bele hetan fini jogadór ne’ebé di’ak,” Abrão Saldanha hateten.

Total apoiu hosi Korea ho orsamentu refere hodi halo konstrusaun kampu komunitáriu tolu, inklui ho sentru treinamentu ho dormitóriu no prepara mós manual treinamentu ba jogadór sira.

Hosi sorin seluk, Xefe Suku Becora António da Silva Soares, kinta ne’e, hatan ba Agência Tatoli iha nia serbisu fatin, katak sira-nia parte kontente atu Governu hamutuk ho Korea hadi’a kampu Kulau ne’e sai sentru futeból di’ak liubá futuru Timor-Leste nian.

“Ami konkorda tebes atu harii sentru futeból iha fatin ne’e, uluk kedan komunidade sira hela besik iha kampu ne’e koopera tebes se Governu atu halo buat ruma iha ne’e sira pronuo sai de’it,” Xefe Suku Becora António da Silva Soares hateten.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here