Edifísiu eskola filiál Oplegul, besik monu ona. Imajen Tatoli/ Sérgio da Cruz

BOBONARO, 08 jullu 2021 (TATOLI)—Edifísiu eskola filiál Oplegul, postu administrativu Maliana, munisípiu Bobonaro, besik monu tanba ai-rin, piku  inklui kalén lahuk hotu ona.

“Ami presija apoiu hodi halo konstrusaun urjente ba edifísiu ne’e, tanba tempu udan mós besik ona. Edifísiu ne’e lakleur bele monu tanba agora anin mós makás dalaruma estudante-sira trauma,” Koordenadór eskola Filomeno Saicbesin Soares, hateten ba jornalista Agência Tatoli, iha rezidénsia bairru ospitál tuan, Holsa Maliana, kinta ne’e.

Notísia relevante:Bobonaro hein desizaun MEJD implementa ensinu aprendizazen

Nia konta-tuir katak, antes ne’e bainhira tempu udan estudante-sira labele partisipa iha ensinu aprendizazen, tanba kalén ku’ak, udan-been turuk ba eskola laran.

Nune’e mós profesér, Manuel Nuakandala, hateten kondisaun eskola ne’e halo estudante-sira labele aprende ho seguru, tanba didin de’it ho piku ne’ebé lahuk hotu ona, animal tama-sai, prezudika fali prosesu aprendizazen.

“Prosesu aprendizazen bele la’o ho di’ak, bainhira fatin ne’e seguru, no durante ne’e animal movimentu livre iha sala-de-aula,” nia hateten.

Edifísiu eskola ne’e konstrui iha 2009 ho pakote referendu, kompleta ho sala-de-aula tolu la inklui sala ba profesór-sira ne’ebé didin ho piku.

Edifísiu ne’e iha mós fasilidade kompletu hanesan meza no kadeira, no ensinu aprendizazen fahe ba turnu rua, dadeer ho lorokraik

Primeiru to’o sestu anu iha estudante 150 ho totál profesór kontratadu na’in-lima no permanente na’in- ida.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here