Koordenadór CJB, Flavio Sevastião da Costa. Imajen Tatoli/Nelia Fernandes.

DILI, 08 jullu 2021 (TATOLI)—Sentru Juventude Becora (CJB-sigla portugés), sei fó apoia ba juventude sira hosi postu administrativu tolu iha munisípiu Dili iha área emprendedorizmu sosiál ne’ebé liga ba setór produtivu sira.

Notísia Relevante: SEJD sei kria formasaun emprendedorizmu ba joven

Postu administrativu tolu ne’e kompostu hosi Atauro, Cristo Rei, no Metinaro. Purtantu postu administrative tolu iha suku hamutuk 16. Atividade emprendedorizmu sosiál ne’e realiza tanba hetan apoia orsamentu hosi Sekretaria Estadu Juventude no Desportu (SEJD) ho montante rihun $25.

“Programa emprendedorizmu sosiál juventude suku ne’e liga ba programa agrikultura, pekuária, peska, no ortikultura, liga ba turismu komunitária, promove juventude sira iha suku, nune’e komunidade sira labele soe fo’er iha lixu,” Koordenadór CJB, Flavio Sevastião da Costa, hateten ba Agênsia TATOLI, iha nia knar-fatin, Becora, Dili, kinta ne’e.

Nia fó-sai katak, oras ne’e CJB hein hela submisaun proposta hosi suku 16 iha postu administrativu tolu ne’e tanba to’o fulan-agostu tama ona iha faze fó apoia orsamentu nune’e atividade bele la’o ona.

Nia dehan, proposta ne’ebé submete mai sei husu husu montante orsamentu no kada grupu iha balansu jéneru entre feto, mane, no ema ho defisiénsia sira.

Totál grupu ba iha postu administrativu Atauro nian trajetu iha grupu 10, Cristo Rei grupu 10 no grupu hosi Metinaro hamutuk grupu tolu (3).

“Ba proposta, kada suku ida submete proposta ida ka rua no ekipa sei halo evaluasaun ba proposta ne’e, tanba suku ida sei pasa ho proposta ida,” nia hateten.

Entretantu, tuir kritériu hosi Sekretáriu Juventude no Desportu (SEJD), suku lima ba leten sei hetan apoia ho orsamentu rihun $10, no suku haat mai kraik sei hetan apoia ho orsamentu rihun-lima.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here