Prezidente ANPM, Florentino Mateus Soares Ferreira. Imajen TATOLI/Egas Cristovão

DILI, 08 juñu 2021 (TATOLI)-Prezidente Autoridade Nasionál Petróleu no Minerál (ANPM), Florentino Mateus Soares Ferreira, hateten nu’udar autoridade reguladór ba setór petrolífera, iha kompromisu boot atu dada besik indústria petróleu ba populasaun sira liuhosi perfurasaun mina-matan sira iha rai-maran.

“Ita haree durante ne’e, populasaun Timor-Leste dook hosi indústira petrolífera tanba ita halo izolada iha tasi-laran, ne’ebé ita-nia ema sira la koñese, maibé agora ita hakarak lori indústria ne’e besik ba ita-nia komunidade nia le’et,” Prezidente ANPM, hateten ba Agência TATOLI iha ninia knaar fatin, sesta ne’e.

Objetivu lori indústria besik ba populasaun, atubele koñese esplorasaun riku-saoin rasik ne’ebé fó impaktu sosiu-ekonómiku no ambientál, liuliu iha aspetu kontiúdu lokál ka fó kampu serbisu ba timor-oan sira.

Iha tinan 2017, hahú halo peskiza jeolójia no estudu iha bloku lima no iha outubru 2018 sei realiza teste sízmiku iha bloku A, enkuantu iha bloku C iha Zona Betano (entre alas no Hatudu) ho teste vibroseis.

Nune’e, iha bloku A ne’ebé ida-idak hosi perfurasaun tolu iha shallow-field to’o metru 2.000 ho ninian kalkulasaun kustu bele to’o milaun $35.

Enkuantu, bloku B haruka ona ba Timor Gás no Petróleu, Empreza Públika (Timor GAP, E.P) iha onshore Block, ne’ebé hanesan subsidiáriu.

Dirijente ne’e konsidera, Timor Resoruces PTY, Ltd  nia bloku rua ho Timor GAP, E.P nia bloku ida iha Suai no Manufahi sai hanesan teste ida atu dezenvolve indústria petrolífera iha rai-maran.

“Ita iha bloku sia tan iha rai maran, no iha bloku 11 ne’ebé daudaun ne’e ita fa’an no promove hela mundu atu empreza internasionál sira bele iha interese atu mai  investe,” nia akresenta.

ANPM ho esperansa katak liuhosi perfurasaun dahuluk iha rai maran ne’e bele fó rezultadu di’ak atubele lori indústria onshore mai iha komunidade nia le’et hodi hetan benefísiu sosiu-ekonómiku.

Iha faze perfurasaun mak iha rezultadu di’ak no hetan mina, sei tama ba faze dezenvolvimentu explorasaun ne’ebé sei kria indústria iha rai maran, liuliu monta kadoras entre posu ida ba posu seluk ne’ebé sei fó servisu barak ba timor-oan.

“Ita la mai atu sai penontong ba setór ida, maibé ita mai hahoris no hamoris indústria ida atu buras hodi povu sente benefísiu hodi kontribui ba dezenvolvimentu ekonómiku,” nia hatutan.

Estadu Timor-Leste halo ona akordu ka asina kontratu fahe produsaun (PSC, sigla inglés) barak iha explorasaun iha tasi-laran liuliu kampu Bayu-undan, maibé iha rai-maran foin dahuluk fó lisensa ambientál ba empreza Timor Resources hodi halo perfurasaun mina iha rai-maran, Kosta Súl.

Notísia relevante: Governu atribui lisensa ambientál ba Timor Resources fura mina-matan

“Ita haree durante iha tinan 17, industria petrolífrea barak mak akontese iha tasi-laran maibé izoladu tanba povu la akompaña, entaun ema la koñese indústria petrolifera ne’e,” nia dehan.

Nune’e, nia rekoñese indústria petrolífera seidauk moris iha Timor-Leste tanba barak liu dominante ho teknolojia ne’ebé sofistikadu ho investimentu ne’ebé boot.

“Ita-nia objetivu mak hahú ohin ba oin atu hamoris indústria ita la sai penonton maibé harii duni indústria petrolífera ho prezensa Timor Resource no Timor GAP atu hatudu ba povu katak indústria ida seguru no kontribui ba ambiente, ne’ebé bele fó benefísiu ekonomia,” Prezidente ANPM subliña.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here