iklan

MUNISÍPIU, VIQUEQUE

2021, suku haat iha Ossu sei asesu eletrisidade

2021, suku haat iha Ossu sei asesu eletrisidade

Liña eletrisidade iha Viqueque-Vila. Imajen Tatoli/Vitorino Lopes da Costa

VIQUEQUE, 8 jullu 2021 (TATOLI)— Eletrisidade Timor-Leste, Empreza Públika (EDTL,E.P), iha ona konkursu ba fornesimentu liña elétrika ba suku haat iha postu administrativu Ossu, munisípiu Viqueque, iha tinan 2021.

“Ami halo ona audiénsia ho administradór munisípiu, adiministradór postu no xefe suku-sira atu partilla planu EDTL ne’ebé iha tinan 2021 sei dada eletrisidade ba suku haat,” Prezidente EDTL,E.P, Paulo da Silva, hateten ba jornalista Agência Tatoli, iha adiministasaun Viqueque, kuarta ne’e.

Notísia relevante:OJE 2021, Viqueque ezekuta ona 23%

Paulo da Silva  informa katak,suku haat ne’e enkaixa iha pakote projetu eletrisidade 30 ne’ebé lansa ona ba públiku, no husu apoiu hosi autoridade munisipál, nune’e bele fó susesu ba projetu ne’e.

Kona-bá suku tolu iha postu administrativu Lacluta, EDTL,E.P mós tau ona konsiderasaun  no tinan ne’e sei aselera Bill Of Quantity (BOQ), ne’ebé iha posibilidade boot sei realiza tenderizasaun iha tinan 2022.

Iha fatin hanesan, administradór munisípiu Viqueque, Januário Soares ‘Bolly’ agradese ba EDTL,E.P ne’ebé iha 2021 sei dada eletrisidade ba suku balun iha postu administrativu Ossu.

“Ha’u agradese ba EDTL,E.P tanba iha tinan ida ne’e atu dada eletrisidade ba komunidade iha Ossu. Husu mós autoridade suku, komunidade atu koopera ho kompañia ne’ebé manán tenderizasaun hodi bele ezekuta ho di’ak, tanba povu hela kleur ona iha nakukun laran,” Januário Soares ‘Bolly’, apela.

Suku haat ne’ebé identifikadu atu hetan fornesimentu liña elétrik iha 2021 mak hanesan suku Uabubo, Waibobo, Nahareka no Builo.

Jornalista: Vitorino Lopes da Costa

Editór: Cipriano Colo

iklan
iklan

Leave a Reply

iklan
error: Content is protected !!