Ilustrasaun inan isin-rua. Imajen/Espesiál

BAUCAU, 07 jullu 2021 (TATOLI)–Diretór Servisu Saúde Munisípiu Baucau (SSMB), Domingos Reinaldo da Costa Guterres, hateten, profisionál saúde sira kontinua sensibiliza promosaun saúde ba inan isin-rua iha sentru saúde.

“Liuhosi mekanizmu oinoin, diretamente sensibiliza promosaun saúde ba individuál no grupu, liuhosi pasa informasaun ba ema hotu hahú hosi isin-rua dahuluk katak inan ne’ebé laiha ona misturasaun ba fasilidade saúde ne’ebé besik, durante isin-rua tenke konsulta beibeik-an mínimu dala haat di’ak liután, durante isin-rua to’o partu,” Diretór informa iha ninia knaar fatin, Ria-mare, kuarta ne’e.

Saúde munisipál orienta atu atende inan isin-rua liuhosi ospitál, sentru saúde, postu saúde, mobile klíniku no fasilidade saúde seluk.

“Objetivu mak atu haree inan nia kondisaun maibé bainhira ema barak, pesoál saúde fahe ekipa atu ba direta kontrola iha uma ou pasiente rasik ba fasilidade saúde,” nia akresenta.

Bainhira partu ona, pesoál saúde nafatin kontrola tantu inan no bebé, ho períodu kontrolu loron 3, loron 7, semana 2, to’o loron 28.

Pesóal saúde ba uma atu haree kondisaun inan, karik iha ran fakar, ran menus ka anemia inklui infesaun no isin manas ruma, nune’e mós observa bebé hafoin partu hanesan susu di’ak ka lae no karik husar kanek.

Liuhosi sensibilizasaun uza meiu oin-oin iha mudansa kompara ho pasadu, tamba liuhosi parte inan no joven.

“Ita pasa informasaun ba sira atu komprende, nune’e to’o bainhira forma uma-kain diretamente asesu-an iha fasilidade saúde,” nia hatutan.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here