Diretór Jerál Obra Públika, Rui Hernani, no Prezidente ANPM, Florentino Soares Ferreira, asina akordu integrál ho kompañia Uhcae. Imajen/ANPM

DILI, 07 jullu 2021 (TATOLI)–Governu liuhusi Ministériu Obra Públika (MOP) no Autoridade Nasionál Petróleu no Minerál (ANPM) asina akordu integrál ho kompañia Uhacae Lda, ba projetu reabilitasaun área estrasaun fatuk iha aldeia Cai Uai Ho’o, suku Ossú de Cima, postu administrativu Ossú, munisípiu Viqueque.

Prezidente ANPM, Florentino Soares Ferreira, hateten papél importante autoridade reguladór maka atu kontinua suporta no fasilita dezenvolvimentu iha Timor-Leste tuir enkuadramentu legál aplikável, ne’ebé sei la sai barreira ba prosesu dezenvolvimentu.

“Akordu refere sei asegura komprimisu hosi kompañia Uhacae, Lda, hodi reabilita filafali área eskavasaun ne’ebé abandona ona iha tinan 2016,” Prezidente ANPM informa liuhosi nota imprensa ne’ebé Agência TATOLI asesu, kuarta ne’e.

Iha biban hanesan, Diretór Jerál Obra Públika, Rui Hernani, agradese ba kooperasaun hosi parte hotu hodi realiza akordu ne’e no reafirma pozisaun MOP atu suporta implementasaun akordu.

Tuir planu, bainhira reabilitasaun aprovadu, atividade sei inklui cut and fill (levelling) hodi asegura slope stability no mós kuda filafali ai-horis hodi halo manutensaun ba área mina abandonadu iha períodu fulan-24 nia laran.

Akordu ne’e sita materiál restu sira hosi atividade cut and fill, ne’ebé sei utiliza hodi suporta finalizasaun projetu konstrusaun estrada hosi MOP iha sesaun STA 5+ 155 to’o sesaun STA 14 00 iha postu administrativu ossú, munisípiu Viqueque.

Nune’e, kompañia kompromete atu implementa planu reabilitasaun aprovadu iha sítiu eskavasaun.

Akordu ne’e realiza tanba esforsu konjunta hosi ANPM, MOP, kompañia Uhacae Lda, inklui konsiderasaun ba rekomendasaun sira ne’ebé mai hosi avaliasaun konjunta entre ANPM ho liña ministeriál sira seluk hanesan Diresaun Nasionál Konservasaun Natureza (DNCN, sigla portugés) ne’ebé implementa iha tinan 2019.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here