Jogador Lalenok Unted FC Kamizola mean kinur kontrola hela bola bainhira joga ho SLB Laulara FC iha Final Tasa 12 Novembru 2020 iha estadiu Munisipál Dili, 12/12/2020.Imajen Tatoli/Antonio Goncalves

DILI, 07 jullu 2021 (TATOLI) –Klube futeból rua; Lalenok United FC hosi Timor-Leste ho Visakha FC hosi Cambodia hakat liubá jogu faze grupu tasa Asian Football Confederation  (AFC) 2021.

Notísia Relevante : AFC Cup, Lalenok kontra Visakha iha Singapura

Lolos ekipa rua tenke joga uluk iha faze play off maibé tanba pandemia global Covid-19 halo parte rua labele hala’o jogu. Tanba ne’e, AFC foti desizaun ba klube rua hakat direita ba jogu grupu.

Desizaun ne’ebé AFC foti fó oportunidade kedan ba Lalenok United FC no Visakha okupa iha grupu I hamutuk ho klube rua seluk, Geylang Internasional FC hosi Singapura no Terengganu FC hosi Malázia.

Sekretáriu Jerál Federasaun Futeból Timor-Leste (FFTL), Nelio Isaac Sarmento hatete, sira nia parte hetan ona informasaun hosi AFC no komunika ona ba Lalenok.

Notísia Relevante : Lalenok United FC reprezenta TL iha Kopa AFC 2021

“Lolos sei iha faze play off, maibé tanba kestaun pandemia no nasaun barak la prontu sai uma-na’in, ikus mai AFC halo desizaun klube rua hakat direita ba faze grupu,” Nelio Isaac Sarmento, konfirma  ba Agência Tatoli iha edifísiu FFTL Dili, kuarta ne’e.

“Ami hanesan federasaun hein de’it Lalenok prepara an, prepara nia atleta hodi ba joga. Tanba ita haree desizaun ne’e oportunidade di’ak ida. Se loron besik atu joga mak Lalenok seidauk preparadu sira tenke nakloke an ba FFTL nune’e ami bele komunika ba AFC,” Nelio Isaac hateten tan.

Eis Sekretáriu Estadu Komunikasaun Sosiál (SEKOMS) ne’e esplika, bainhira Lalenok la-biban nafatin atu partisipa sei la fó implikasaun. Importante Lalenok tenke iha razaun ne’ebé forte hodi la partisipa ne’e, atu  FFTL  bele hato’o ba AFC, hanoin mundu hotu implika pandemia ne’e, ho númeru pozitivu sa’e beibeik no mundu asesu hela TL situasaun ne’ebé di’ak hela, importante mak Lalenok nakloke de’it.

Jornalista Agência Tatoli tenta ona atu halo konfirmasaun ho Lalenok United FC hodi konfirma sira-nia preparasaun, maibé superiór klube labele fó komentáriu tanba okupadu ho servisu esensiál seluk.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here