Embaisadór Dizignadu Timor-Leste ba Korea Sul, Gregório de Sousa. Imajen Tatoli/Francisco Sony

DILI, 07 jullu 2021 (TATOLI) – Embaixadór dezignadu Timor-Leste ba Korea Sul, Gregório de Sousa hateten, bainhira hala’o misaun hanesan diplomata iha Korea Sul prioridade prinsipál ne’ebé nia sei hala’o mak buka atu hametin liután kooperasaun entre rai-rua.

“Ha’u nia misaun primeiru iha ne’ebá mak tenke buka hatene kooperasaun entre Timor – Leste ho Korea oinsá atu hametin liu-tan, buka dalan atu koopera iha area oi-oin,” Gregório de Sousa, hateten ba Agéncia Tatoli iha Becora, Dili, kuarta ne’e.

Alende ne’e, sei tau prioridade mós ba traballadór timoroan ne’ebé daudauk ne’e servisu hela iha Korea Sul.

“Ha’u mós sei haree oinsá atu komunika ho Governu Korea Sul nian atu haruka tan traballadór timoroan sira ba iha area seluk la’ós de’it iha fábrika no peska,” nia dehan.

Iha fatin hanesan  Diretór Diresaun Nasionál Empregu Exterior (DNEE), Filomeno Soares hateten, númeru traballadór timoroan iha Korea Sul hamutuk  2.890 servisu iha area peska no fabrika.

“Sira balu nia vistu inválidu ne’e ami servisu hamutuk ho Ministériu Negósiu Estranjeiru no Kooperasaun hodi rezolve,” nia hateten.

Traballadór hirak ne’ebé fila ona mai Timor-Leste tanba kontratu remata ona hamutuk na’in 803 no tuir Filomeno Soares, sira-ne’e sei bele hetan tan oportunidade, tanba iha Korea  Sul iha tan teste espesiál ida ba de’it sira ne’ebé mak kontratu hotu fila ona.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here