Sekretáriu Estadu Juventude no Desportu (SEJD), Abrão Saldanha, konversa ho Prezidente LFTL, Nilton Gusmão ho Sekretáriu Jerál FFTL, Nelio Isaac Sarmento. Imajen/Dok.LFA

DILI, 07 jullu 2021 (TAT0LI) – Sekretáriu Estadu Juventude no Desportu (SEJD), Abrão Saldanha, hateten Governu sei la finansia ona 100% ba Liga Futeból Timor-Leste (LFTL).

Notísia Relevante : SEJD-FFTL no LFTL sei diskute kalendáriu liga

Nia hateten, Governu sei apoiu de’it 50% tanba koordena ona ho Federasaun Futeból Timor – Leste (FFTL) atu finansia mós 50% hodi LFTL bele hala’o atividade liga époka 2021.

“Liga futeból agora la 100% finansia hosi Governu, tanba 50% finansia hosi FFTL,” SEJD Abrão Saldanha informa ba Agência Tatoli iha edifísiu SEJD, Dili, kuarta ne’e.

Hosi sorin seluk, Sekretáriu Jerál FFTL, Nelio Isaac Sarmento, hateten sira-nia parte prontu atu apoiu LFTL, maibé tenke Governu iha informasaun ne’ebé klaru.

“Ba atividade liga ne’e rasik FFTL suporta tan ba ami laiha problema, maibé tenke iha informasaun ida hosi Governu ho razaun forte ruma, nune’e ezekutivu FFTL bele iha desizaun atu apoiu atividade liga nian,” Nelio Isaac Sarmento hateten.

Nia dehan, loloos iha tinan kotuk realize ona enkontru trilateral iha SEJD nia fatin kompostu hosi Governu, FFTL no LFTL hodi haree ba prósimu liga.

“Governu konkorda ona ho FFTL, ba apoiu atividade liga nian Governu sei finansia. Orsamentu ne’ebé Governu apoiu sei la ba diretamente LFTL, maibé sei liuhosi FFTL tanba ho hanoin ida katak FFTL mós sei kontribui osan balu ba LFTL liu-liu suporta ba klube 20 iha Primeiru Divizaun no Segunda Divizaun. Se agora Governu mai ho hanoin seluk ida ba liga ne’e FFTL tenke suporta tan orsamentu ami prontu, importante Governu iha razaun klaru,” nia dehan.

Sekretáriu Ezekutivu LFTL, Francisco Marçal S. da Silva, hateten sira-nia parte prontu simu apoiu orsamentu ne’ebé finansia hosi Governu no FFTL.

“Ami liga hein de’it, importante parte rua finansia uluk 50% mai para funsiona servisu administrasaun hodi tama ba atividade,” Francisco da Silva tenik.

Nia informa, tuir konkordánsia ne’ebé parte rua; LFTL no FFTL halo ona katak iha loron 14 ka 15 agostu mai ne’e, parte rua sei asina plataforma memorandu ida entre Prezidente FFTL no LFTL hodi servisu hamutuk hafoin hakat ba preparasaun tékniku.

Tuir oráriu ne’ebé iha jogu ba LFTL, Kopa FFTL no Tasa 12 de Novembru sei hala’o iha agostu nia laran no remata iha dezembru mai ne’e.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here