Logotipu FOHAFUTI,

DILI, 07 jullu 2021 (TATOLI)—Sentru Formasaun Foinsa’e Hahú Futuru Timor (FOHAFUTI) durante ne’e servisu hamutuk ho Ministériu Edukasaun Juventude no Desportu (MEJD) fó formasaun ba joven sira-ne’ebé la termina estudu liuhosi ensinu rekorrente atubele hetan diploma.

“Sentru ne’e halo kooperasaun ho Governu hodi fó formasaun liuhosi programa ”Eskola ba Komunidade sira”, hanesan ema-ne’ebé la termina estudu tuir eskola ensinu rekorrente ho durasaun fulan neen hafoin tuir ezame. Dixiplina ezame ne’e hosi MEJD no bainhira sira pasa, bele hetan diploma hosi MEJD,” Prezidente Sentru Formasaun FOHAFUTI, Estevão Soares, ba Agência Tatoli, iha nia knaar fatin, Mota Ulun, Becora, kuarta ne’e.

Ema hamutuk na’in-19 mak partisipa iha formasaun ‘Eskola ba Komunidade’, ne’ebé nia formadór sira mai hosi Universidade Nasionál Timor Lorosa’e (UNTL), Universidade da Paz (UNPAZ), Institutu Superior Cristal (ISC), Institutu Siénsia Relijioza (ICR), Universidade Díli (UNDIL).

“Dixiplina ne’ebé sira hetan iha eskola rekorrente ne’e mak kímika, matematika, siénsia sosiál, dalen tetun, portugés no inglés,” nia informa.

Maibé, nia dehan, durante ne”e formasaun paradu tanba Estadu emerjénsia no serka sanitaria. Daudaun ne’e, nia parte sei hein desizaun hosi Governu liu-liu MEJD atu reativa ensinu aprendizajen iha eskola sira iha territóriu nasionál.

“Ami hanesan NGO ida atu foti mesak desizaun labele, tanba NGO ida-ne’e parseria ho Governu. Bainhira desizaun dehan reativa, ami reativa. Maibé kuandu reativa, ami mós sei la’o tuir nafatin protokolu Ministériu Saúde no Organizasaun Mundiál Saúde nian,” Estevão Soares hateten.

Nia informa, joven sira-ne’ebé durante ne’e tuir formasaun iha sentru refere (2021) hamutuk 92; iha área lian portugés, inglés, español no korea.

FOHAFUTI harii iha loron 8 fulan-agostu 2016, funda hosi estudante, veteranu no bolseiru, ho objetivu loke dalan ba Timor-oan hotu atu partisipa no oinsá asesu filafali edukasaun.

Totál formandu ne’ebé tuir formasaun iha ne’e hosi estabelesimentu tinan 2016 to’o agora hamutuk ema na’in-200-resin.

Hosi númeru ne’e ema na’in 50 hetan ona servisu iha Inglatera, Korea, Austrália, no mós iha instituisaun Governu, no formadór iha sentru ne’e hamutuk ema na’in 23, hosi númeru ne’e formadór mesak timor-oan.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here