Eskola Ensinu Sekundáriu Tékniku Vokasionál (ESJTEKVOK) 28 novembru, Becora, Dili. Imajen/MediaONETimor.net

DILI, 07 jullu 2021 (TATOLI) – Eskola 76 iha Munisípiu Dili preparadu ona atu re-ativa ensinu aprendizajen prejensiál.

Notísia Relevante : 80% profesór-sira vasina ona, MEJD re-ativa ensinu aprendizajen prejensiál

Númeru eskola hirak ne’e tuir rezultadu levantamentu hosi Servisu Edukasaun Munisípiu Dili nian katak eskola sira ne’e prienxe ona rekizitu atu bele re-ativa ensinu aprendizajen prejensiál. Ezemplu, sira-nia profesór maioria simu ona vasina, hamoos ona eskola no mós prepara kondisaun ijiene no aseitasaun nian tuir protokolu saúde públiku.

“Ami iha ona dadus eskola 76 maka preparadu atu re-ativa ensinu aprendizajen prejensiál tanba númeru persentajen atinje ona 60% ba leten,” Diretór Servisu Edukasaun Munisípiu Dili (SEMD), Duarte Bragansa, hateten ba Agência Tatoli iha nia serbisu fatin, Dili, kuarta ne’e.

Hosi eskola sira-ne’e iha eskola Pre-eskolár hamutuk 60 atinje ona 75%,  Eskola Ensinu Báziku (12) atinje ona 60% bá leten no Ensinu sekundária Jerál Tékniku Vokasionál (5) atinje ona 60% bá leten.

Eskola ensinu báziku 12 ne’ebé kumpre ona atu prontu re-ativa ensinu aprendizajen mak hanesan EBC Cristal atinje ona 75%, EBC Saõ Miguel Arkanjo (75%), EBC Nicolau Lobato (92%), EBC Maumeta Vila (65%), EBC São Francisco Xavier Dare (61%), EBF Makili (65%), EBC Perola (60%), EBF Maker (100%), EBF Atékru (83%), EBF Makadadi (91%), EBC Herois da Patria mós atinje ona 86%.

Eskola ensinu sekundária jerál tékniku vokasionál lima (5) ne’ebé preparadu ona mak hanesan Eskola Tékniku Informátika (ETI) atinje 90%, ESTV Hotelária Turizmu Becora (61%), ESJ Canossa   (75%),  ESJ Nobel da Paz (85%) ho ESJ São Francisco Xavier Dare (86%).

Hosi sorin seluk, Diretór Eskola Ensinu Báziku Sentrál (EBC) Cristál, Fernando Mesquita dehan totál profesór iha eskola ne’e hamutuk 54 kompostu hosi primeiru no segundu siklu na’in-24, terseiru siklu na’in-30 ne’ebé maioria vasina ona.

Fernando Mesquita buka nafatin informasaun atu totál profesór-sira ne’ebé seidauk simu vasina ne’e bele hetan oportunidade iha faze tuir mai. Maske nune’e, nia konsidera númeru profesór ne’ebé simu ona vasina boot liu no sira prepara duni atu re-ativa prosesu ensinu aprendizajen aula prejensiál.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here