Ministru Ensinu Superiór, Siénsia no Kultura (MESSK), Longuinhos dos Santos. Imajen Tatoli/Egas Cristóvão

DILI, 07 jullu 2021 (TATOLI)–Ajénsia Nasionál Avaliasaun Akreditasaun Akadémiku (ANAAA) sei halo fila-fali avaliasaun ba kursu post-graduasaun hosi Universidade Nasionál Timor Lorosa’e (UNTL) ne’ebé Governu deside ‘konjela’ ka suspende dezde 2013.

Notísia Relevante : Dezde 2013, Governu konjela kursu post-graduasaun UNTL

Ministru Ensinu Superiór, Siénsia no Kultura (MESSK) Longuinhos dos Santos,  afirma kursu post-graduasaun bá mestradu no doutoramentu iha UNTL hetan suspensaun tanba la prienxe rekizitu-sira ANAAA aprezenta.

“Normálmente iha pontu ualu ne’ebé estabelese nu’udar rekizitu ba Institutu Ensinu Superiór sira tenke kumpre atu estabelese kursu post-graduasaun. Maibé, ha’u bele hateten de’it pontu haat ne’ebé iha mak hanesan rekursu umanu, infraestrutura, kurríkulu no jestaun institusionál,” Ministru Longuinhos  dos Santos, hatetne ba jornalista-sira iha  Palásiu  Governu, foin lalais ne’e.

Hosi sorin seluk, Diretór Ezekutivu ANAAA, Edmundo Viegas konsidera katak kursu post-graduasaun bá mestradu no doutoramentu iha UNTL ne’e autorizadu hela. Signifika iha hela lista MESSK nian ne’ebé kursu sira ne’e konsidera rejistadu hela.

Edmundo Viegas haktuir, kursu-sira iha UNTL balun ativu balun lae ne’e depende bá kapasidade UNTL nian atu fó kontinuasaun bá kursu sira-ne’e, tanba kursu sira-ne’e bazeia bá kooperasaun entre UNTL ho universidade estranjeiru-sira. Ne’e duni UNTL de’it mak bele responde tansá mak kursu balun ativu no balun lae.

“Ami nia planu tinan ida ne’e atu submete tan kursu mestradu no post-graduasaun balun iha UNTL atu tuir akreditasaun, maibé nivel preparasaun UNTL nian seidauk sufisiente hasoru akreditasaun entaun provizoriamente sira-nia lista la inklui iha planu avaliasaun ami nian iha tinan ida ne’e,” Edmundo tenik.

 Jornalista : Tomé Amado

Editór       : Francisco Simões  

HAKEREK NO HATÁN

Please enter your comment!
Please enter your name here