Diretóra Sentru Formasaun Agape Foundation for Asía Pacific Ministries, Wennie O. Fernandez. Imajen Tatoli/Nelia Fernandes.

DILI, 07 jullu 2021 (TATOLI)—Diretóra Sentru Formasaun Agape Foundation for Asía Pacific Ministries, Wennie O. Fernandez, hateten  Ministériu Solidariedade Sosiál no Inkluzaun (MSSI) apoia rihun $32 ba sentru formasaun AGAPE hodi fó kapasitasaun ba ema defisiénsia tilun (problema ho rona) iha área edukasaun, fila-liman (negósiu) no desportu.

Diretora ne’e hatutan, iha área edukasaun AGAPE fó formasaun kona-ba hakerek no lee, matematika, komputadór, biolójia, siénsia jerál, no prinsipál liu mak fó formasaun kona-bá lian jestuál ne’ebé bele tulun sira atu hatene no komprende ema seluk ko’alia liuhosi jestuál.

Notísia Relevante: KDTTL prontu servisu hamutuk ho Governu no mídia promove “Lian Jestuál”

“Iha tinan 2019-2020, Governu liuhosi MSSI apoia AGAPE rihun $32 ho objetivu kapasita ema defisiénsia tilun sira liuhosi atividade formasaun iha área edukasaun mak hanesan fila-liman (negósiu), desportu no aprende lian jestuál,” Wennie O. Fernandez hateten ba Agência Tatoli, iha nia knaar fatin, Delta I, Dili, kuarta ne’e.

Diratora ne’e haktuir, iha 2004, AGAPE hahú hanorin ona lian jestuál ba ema defisiénsia tilun iha Timor-Leste no to’o 2010 komesa hala’o edukasaun non formál hodi fahe esperiénsia ba ema defisiénsia tilun iha Timor-Leste.

“Hahú hosi ezisténsia, ha’u mak fahe ha’u-nia matenek ba ema Timor, liu-liu ba ema defisiénsia tilun ho totál 135. Agora sira hatene ona. Hosi totál ne’e, iha ema defisiénsia tilun hamutuk na’in-neen mesak feto mak hanorin fali sira-nia kolega defisiénsia tilun sira-ne’ebé seidauk hatene lian jestuál ne’e,” nia dehan.

Foufoun nia oferese án fó formasaun kona-ba lian jestuál ne’e laiha ema ida mak interrese, entaun nia troka planu hodi fó formasaun ba ema defisiénsia tilun sira-ne’ebé iha interrese aprende, hafoin sira mak fó fali formasaun ba sira-nia kolega sira inklui labarik defisiénsia tilun sira.

Notísia Relevante: Tinan 2019, Governu apoiu $372-resin ba organizasaun defisiente sira

Tuir nia, iha ema ho defisiénsia tilun balun ba eskola no hetan diploma maibé bainhira sira mai iha AGAPE ne’e balun seidauk bele hatene lee no konta númeru sira, tanba ne’e nia parte fó apoiu no fó-hanorin sira kona-bá oinsá hakerek no lee.

Suku roupa. Imajen Tatoli/Nelia Fernandes.

Aleinde ne’e, AGAPE mós fó formasaun kona-ba fila-liman (negósiu) ba ema dsifisiénsia tilun oinsá aprende suku no fó apoia ekipamentu ba sira, hodi halo atividade suku pasta, hodi faan fila-fali ba ema.

Durante ne’e, sira faan sira-nia sasán iha Timor Plaza maibé tanba pandemia COVID-19 entaun to’o agora sira la faan ona.

Tuir kompetisaun iha Korea-Taiwan

Entretantu, iha tinan 2012 ne’e Sekretáriu Estadu Juventude no Desportu (SEJD) no Asosiasaun Defisiente Tilun TimorLeste (ADTL) apoia AGAPE lori ema defisiénsia tilun sira hodi tuir kompetisaun iha Korea no Taiwan.

Iha tinan 2014, pesoal balun hosi Singapura apoia ema defisiénsia tilun tuir konferénsia mundiál iha Singapura no iha tinan 2016 lori ema defisiénsia tilun hodi ba tuir konferénsia mundiál iha Filipina.

Sentru Formasaun Agape Foundation for Asía Pacific Ministries estabelese iha tinan 2004, ne’ebé funda hosi Wennie O. Fernandez, hodi haree liu ba programa kona-ba edukasaun, fila-liman (negósiu) no desportivu.

“Programa edukasaun, sira tenke aprende tanba laiha eskola no bele inklui sira iha eskola públiku maibé laiha tradutór, laiha fasilidade no profesór no profesora laiha. Konaba fila liman, ho objetivu prepara sirania futuru bainhira sira la hetan servisu iha instituisaun Estadu no ONG. Hosi atividade fila-liman ne’e, ha’u prepara sira ba sirania futuru, atu harii sirania negósiu rasik,” nia informa.

Totál formandu ema defisiénsia tilun iha AGAPE hamutuk 135, inklui labarik na’in-12.

Notísia Relevante: Formandu Lian Jestuál Sei Estajiu Iha Instituisaun Públika Sira

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here