Diretór Raes Hadomi Timor Oan (RHTO), Joãozito dos Santos, hosi liman karuk ba datoluk.

DILI, 06 jullu 2021 (TATOLI)—Diretór Ezekutivu Raes Hadomi Timor Oan (RHTO), Joãozito dos Santos, hateten RHTO hamutuk ho Asosiasaun Defisiénsia Timor-Leste (ADTL) fó formasaun kona-ba inkluzivu defisiénsia ba formadór Sentru Treinamentu Vokasionál neen (6) iha Dili laran.

“Ita hamutuk ho ADTL ne’ebé servisu hamutuk ho Governu Austrália nian liuhosi  Worldforce Development Program Timor-leste (WDPTL) hodi fó formasaun ba formadór sira iha Sentru Vokasionál no sentru ne’ebé ita identifika mak Sentru Senai Becora, Sentru Don Bosco Comoro, Sentru ida iha Manleuana, East Timor Development Agency (ETDA) no Sentru treinamentu Vokasionál Juventude Sabraka Laran Becora,” Diretór RHTO hatete ba Agéncia Tatoli, liuhosi telefónika, tersa ne’e.

Nia dehan, treinamentu ne’e ho nia objetivu atu oinsá asegura fatin treinamentu sira bele inkluzivu no asesivél ba ema ho defisiénsia sira katak sentru formasaun hirak ne’e bele akomoda ema ho defisiénsia ba tuir treinamentu ruma.

“Treinamentu ne’e ita fó durante loron tolu hahú 28-30 juñu. Atividade ne’e hetan apoiu hosi Governu Austrália liuhosi WDPTL hodi prodús manuál treinamentu nian ba formandu sira iha sentru treinamentu juventude sira,” nia dehan.

Formasaun konklui hotu ona no RHTO ho ADTL haruka ona relatóriu ba WDPTL atu haree katak formasaun ne’e sufisiénte ka oinsá, no atu aumenta tan formasaun ne’e ba sentru treinamentu seluk no munisípiu sira-ne’e, depende ba WDPTL tanba planu sira-nian depois koopera ho ADTL ho RHTO mak realiza formasaun ne’e.

“Tanba ne’e, parte rua ne’e hein karik WDPTL planu atu realiza no ajuda tan juventude sira iha sentru seluk,” nia dehan.

Hasa’e kapasidade

Entretantu, Diretór Ezekutivu Asosiasaun  Defisiénsia  Timor-Leste (ADTL), Cesário da Silva, hateten ADTL no RHTO, fó formasaun kona-bá inkluzaun defisiénsia iha edukasaun hodi hasa’e kapasidade formadór sira-nian iha sentru trainamentu vokasionál Timor-Leste, atu asegura sentru formasaun hodi integra asuntu defisiénsia iha sira-nia programa no formasaun ne’ebé sira iha.

“Objetivu hosi formasaun ida-ne’e, atu eleva koñesimentu manorin sira-nian, atu eleva koñesimentu hosi manorin sira, iha sentru formasaun sira. Ne’e mai hosi peskiza ida-ne’ebé ami halo ba sentru formasaun sira iha territóriu laran, liuliu sentru formasaun profisionál ne’ebé akredita hosi INDIMO,” Cesário da Silva hateten.

Formasaun ba formadór sira-ne’e atu bele intende oinsá hanorin ema ho defisiénsia sira iha sira-nia sentru. Ezemplu, ema defisiénsia fiziku ida ba tuir formasaun, oinsá sira bele hanorin no defisiénsia matan ida ba karik, oinsa sira halo maneira atendimentu ba sira.

“Formasaun hotu-hotu asegura mós ema ho defisiénsia sira-nia partisipasaun, hanesan tipu defisiénsia oioin, bele hola parte bá, nune’e ita hakarak sentru hotu-hotu hakarak inklusizu, ne’e mai hosi ita-nia polítika rasik. Polítika nasionál edukasaun inkluzivu, polítika informasaun inkluzivu, tanbá ita hakarak sentru formasaun sira dadaun ne’e eziste, hotu-hotu inkluzividade no asesivel ba ema ho defisiénsia atu ema ho defisiénsia bele hola parte iha ne’ebá,” nia dehan.

Hosi númeru defisiénsia ne’ebé durante tuir formasaun hosi tinan 2019 to’o 2020 iha sentru formasaun sira hanesan Sentru Formasaun SENAI Becora, ne’ebé simu ema ho defisiénsia barak. Entaun, dadus ne’ebé ADTL iha ema defisiénsia na’in neen (6), ne’ebé ramata formasaun iha SENAI Becora.

Entretantu, iha tinan 2021, ema defisiénsia sira-ne’ebé tuir formasaun hamutuk ema na’in 24 tuir treinamentu iha sentru formasaun SENAI Becora.

Jornalista : Osória Marques/Nelia Fernandes

Editór        : Cancio Ximenes  

HAKEREK NO HATÁN

Please enter your comment!
Please enter your name here