Sekretáriu Estadu Juventude no Desportu, Abrão Saldanha. Imajen Tatoli/Egas Cristóvão

DILI, 06 jullu 2021 (TATOLI) –Sekretária Estadu Juventude no Desportu (SEJD) servisu hamutuk ho organizasaun internasionál Peace Corps iha Timor-Leste hodi fasilita formasaun iha lain Ingles no formasaun iha área oioin ba juventude sira iha setru juventude ne’ebé estabelesidu ona iha territóriu nasionál.

Sekretáriu Estadu Juventude no Desportu, Abrão Saldanha, hateten SEJD ho Peace Corps estabelese ona kooperasaun iha tinan tolu ba kotuk, oinsá atu mellora kapasitasaun ba juventude-sira iha sentru juventude-sira. Maibé tanba pandemia global COVID-19, ekipa Peace Corps tenke fila ba sira-nia rain Estadu Unidu Amerika (EUA) hodi hein situasaun normal maka sira sei fila fali mai kontinua sira nia misaun.

“Agora sira nia voluntáriu seidauk mai tanba vou internasionál hosi Austrália, inklui Tailándia nian mós sei taka tanba pandemia COVID-19. Espera tinan oin, sira bele mai fali,” Abrão Saldanha informa ba Agência Tatoli iha nia servisu fatin, Dili, tersa ne’e.

Iha sorin seluk Country Director Peace Corps iha Timor-Leste, Kavita Pullapilly konfirma katak, sira-nia parte planu ona tinan oin sei lori fila fali voluntáriu Peace Corps mai Timor-Leste hodi servisu hamutuk ho juventude-sira iha área sira ne’ebé estabelese nanis ona.

“Antes ne’e ami koloka ona voluntáriu sira ba servisu iha sentru juventude iha munisipiu hodi tulun joven sira hodi hasae sira-nia koñesimentu. Entaun ami hakarak programa ne’e lao nafatin hodi koloka voluntáriu-sira,” Kavita Pullapilly hateten.

Peace Corps servisu iha Timor-Leste komesa iha 2002 to’o 2006, bainhira krize mosu voluntáriu sira-ne’e evakua tiha, nune’e iha 2015 fila-fali mai to’o 2020  repatria fali tanba pandemia COVID-19.

Munisipiu ne’ebé iha sentru juventude hodi Peace Corps dezloka nia voluntáriu sira servisu ba hamutuk munisipiu sia (9) no Munisipiu sira ne’ebé la koloka voluntáriu-sira mak hanesan, Lautem, Viqueque, Oé-Cusse no Covalima.

Tuir dadus ne’ebé iha voluntáriu hamutuk na’in 300 mak hala’o servisu voluntáriu iha Timor – Leste hahú 2002-2020.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here