Kontra-atake entre jogadór-sira Imajen/Mídia LFA

DILI, 06 jullu 20201 (TATOLI) – Sekretáriu Estadu Juventude no Desportu (SEJD), Abrão Saldanha, hateten Governu iha ona hanoin atu servisu hamutuk ho Federasaun Futeból Timor – Leste (FFTL) hodi investe ba futeból liu-liu iha faze juvenile nian.

“Ami iha faze diskusaun hela ho FFTL no sira mós diskute namanas hela ho federasaun internasionál-sira kona-ba prosesu futeból ba oin. Estratéjia ne’ebé Governu iha mak hahú investe iha labarik-sira iha baze hafoin to’o prestasaun nivel boot,” Abrão Saldanha hateten ba Agência Tatoli iha edifísiu SEJD, Dili, tersa ne’e.

2021 ne’e SEJD halo ona levantamentu ba sentru juveníl-sira no iha ona estratéjia ba 2022 atu hahú investe ba sentru futeból juveníl-sira ne’ebé eziste ona no aumenta tan.

“Ita sei rekruta hosi labarik-sira, hahú idade 9-13 no prepara fali hosi tinan 13-15 no ikus liu tinan 15-17. Ida ne’e mak ita sei servisu hamutuk ho FFTL atu investe iha munisípiu-sira,” Abrão Saldanha hateten.

Hosi sorin seluk, Sekretáriu Jerál Federasaun Futeból Timor-Leste (FFTL), Nelio Isaac Sarmento konfirma, parte rua halo ona konkordánsia hodi servisu hamutuk.

Nia dehan, kestaun bola iha parte barak mak presiza diskute hamutuk hodi buka solusaun, mak hanesan infraestrutura, rekursu umanu tenke fahe ba rua hanesan formasaun árbitru, treinadór iha futeból no pilár ida mak dezenvolve talentu ba jogadór liu-liu labarik-sira.

Bainhira servisu hamutuk entre parte rua lao, laiha duvida ba FFTL tanba iha ona asosiasaun hamutuk 17 iha Munisipiu hotu no asosiasaun hirak ne’e FFTL iha ona baze apoiu liu-liu formasaun ba labarik sira.

“Buat hotu ami fó hatene ona ba Governu, Governu mós iha hanoin di’ak oinsá mak foku no atensaun ba iha futeból ba labarik-sira, liu hosi sentru treinamentu atu nune’e bele dezenvolve futeból ba oin,” Nelio Isaac Sarmento hateten.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here