Koordenadór seguransa sub-estasaun EDTL, E.P Baucau, Cipriano Hornai da Silva. Imajen TATOLI/Natalino Belo

BAUCAU, 06 jullu 2021 (TATOLI)–Koordenadór seguransa sub-estasaun Eletricidade de Timor-Leste, Empreza Públika (EDTL, E.P) Baucau, Cipriano Hornai da Silva, hato’o preokupasaun ba Prezidente Konsellu Administrasaun EDTL, E.P, Paulo da Silva, kona-ba direitu salariál ba seguransa sira, durante enkontru.

“Durante tinan rua-nia nia laran ami la simu osan, ami hato’o ida-ne’e ba Prezidente Konsellu Administrasaun hodi komunika ba responsável kompañia Gardamor no ohin kedan kontaktu ona, karik posibilidade semana ida-ne’e mai selu uluk traballadór 23, hosi 39 ne’ebé seidauk simu saláriu,” Koordenadór seguransa informa iha sub-estasaun EDTL, Villa nova, tersa ne’e.

Sorumutuk entre Prezidente Konsellu Administrasaun EDTL, E.P, Paulo da Silva, no traballadór segurnsa sub-estasaun EDTL Baucau, tersa (06/07). Imajen TATOLI/Natalino Belo

Kompañia Gardamor sai manan-na’in ba seguransa iha sub-estasaun Baucau, ne’ebé fó serbisu ba traballadór hamutuk 39, maibé hahú hosi 2019 to’o 2021 seidauk fó saláriu ba traballadór sira.

Nune’e, Koordenadór seguransa konsidera, traballadór seguransa ne’ebé serbisu ona iha direitu ezije saláriu no nia parte hakarak bainhira kompañia halo pagamentu saláriu tenki iha deklarasaun eskrita.

“Ohin dehan prontu fó ema 23 nia osan, hafoin 16 seluk sei halo planu, ho nune’e ami konkorda maibé ami nu’udar seguransa ne’ebé serbisu iha direitu nafatin no bainhira halo pagamentu ba traballadór 23 iha loron 16 jullu, hakarak ka lakohi tenki iha konkordánsia ka deklarasaun ruma, labele ko’alia de’it,” nia akresenta.

Iha fatin hanesan, Prezidente Konsellu Admistrasaun EDTL. E.P, Paulo da Silva, hateten, sorumutuk ne’e envolve mós reprezentante asesor jurídiku hosi Prezidente munisípiu Baucau atu koordena ho kompaña ne’ebé selebra kontratu ofisiál ho Governu atu halo diskusaun tékniku ho traballadór sira, nune’e bele rezolve problema pendente ne’ebé to’o agora seidauk rezolve direitu tuir kontratu.

Prezidente Konsellu Admistrasaun EDTL, E.P, Paulo da Silva. Imajen TATOLI/Natalino Belo

“Hau rasik ohin kontaktu ba kompaña nia dirijente atu urjentemente halo komunikasaun ho traballadór halo aranzu tékniku hodi bele rezolve problema saláriu,” nia hatutan.

Prezidente Konsellu Administrasaun sente iha responsável morál atu tau-matan ba asuntu sira liga ho traballadór seguransa no kompañia.

“Ha’u dehan ba sira (kompañia) urjentemente tenki loke komunikasaun lalais ho traballadór sira atu haree prosedimentu saida tenki mai lalais, presiza komunika atubele rezolve,” nia tenik.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here