Forsa Unidade Territoriál kompostu hosi Unidade Patrullamentu Fronteira (UPF) ho F-FDTL hala’o operasaun intensivu iha liña fronteira Munisípiu Covalima. Imajen Tatoli/Eugénio Pereira

DILI, 06 jullu 2021 (TATOLI)—Polísia Nasionál Timor-Leste (PNTL), kontinua kontrola liña fronteira, hodi  evita movimentu ilegál, tanba bele lori perigu ba ema nia vida, liuliu transmisaun COVID-19.

“Polísia esforsu hela atu asegura fronteira no sidadaun ne’ebé ho dalan ilegál sei kaptura hodi prosesa tuir lei,’’ Segundu Komandante Jerál PNTL, Mateus Fernandes, hateten ba jornalista-sira iha edifísiu UEP, Bairru-Pité, tersa ne’e.

Notísia relevante:PNTL detein timoroan na’in-haat ne’ebé tenta hakat ilegál ba Indonézia

PNTL mós halo koordenasaun ho autoridade lokál no populasaun iha área fronteira, hodi kontrola diak liu tan movimentu ilegál.

Nia apela ba sidadaun hotu-hotu ne’ebé hela iha fronteira atu hala’o movimentu tenke liuhosi dalan legál tuir oráriu ne’ebé autoridade fó-sai ona.

“Ema indivídu ida-idak tenke kuidadu saúde la’ós iha seguransa no Ministéiru Saúde nia liman,’’ nia hateten.

Iha fatin hanesan, Komandante Unidade Polísia Fronteira (UPF), Superintendente Euclides Belo, hateten polísia sei la tolera sidadaun ne’ebé halo viajen ilegál iha fronteira.

Euclides deklara katak, nia hetan nomeasaun nu’udár komandante foun UPF iha 01 jullu no orientasaun ne’ebé simu hosi komandante sesante maka, mantein seguransa iha liña fronteira hosi postu ba postu hahú hosi Suai to’o Óe-cusse.

Iha sesta semana kotuk, PNTL detein sidadaun na’in-haat ne’ebé tenta hakat liu fronteira Batugade illegalmente ba Indonézia.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here