Ministru Ensinu Superior, Siénsia no Kultura, Longuinhos dos Santos, asina plaka hodi inaugura edifísiu Fakuldade Medisina Siénsia Saúde UNTL iha Caicoli, Dili, tersa (06/07). Imajen Tatoli/Francisco Sony

DILI, 06 jullu 2021 (TATOLI)-Ministru Ensinu Superiór, Siénsia no Kultura (MESSK) Longuinhos dos Santos, sei fó sansaun ba Instituisaun Ensinu Superiór (IES) ne’ebé re-ativa ona atividade ensinu aprendizajen prejensiál.

Ministru Longuinhos dos Santos, hateten IES hothotu tenke kumpre ba orientasaun Governu nian ne’ebé dekreta ona iha Lei kona-bá suspensaun ba atividade ensinu aprendizajen prejensiál iha situasaun pandemia COVID-19.

“Ha’u sei foti desizaun hasoru IES ne’ebé viola regra no la obedese bá desizaun Governu nian. Ha’u koloka ona ekipa monitorizasaun hodi fiskaliza lala’ok IES sira nian molok deside sansaun ruma tanba lei estabelese ona. IES ne’ebé viola ka la kumpre regra, sira tenke hatán bá prosesu,” Ministru Longuinhos dos Santos hateten bá jornalista sira iha Dili, tersa ne’e.

Reitor UNPAZ, Adolmando Amaral, Imajen Tatoli/Antonio Goncalves

Hosi sorin seluk, Reitór Universidade da Paz (UNPAZ) Adolmando Amaral, akresenta UNPAZ nafatin iha kompromisu bazeia bá deklarasaun Primeiru-Ministru nian katak sidadaun iha territóriu nasionál ne’ebé simu ona vasinasaun doze daruak bele halo ona movimentu.

Bazeia bá deklarasaun ne’e, UNPAZ mós kompleta ona vasinasaun doze daruak bá dosente funsionáriu no estudante sira. Tanba ne’e, Adolmando Amaral, afirma UNPAZ livre ona bele hala’o ninia atividade bazeia bá kalendáriu akadémiku nian.

“Se Ministru Ensinu Superiór hanoin atu fó sansaun husik bá nia hasai tiha sansaun maka ami halo fali rekursu hasoru nia. Tanba ami kumpre desizaun Xefe Governu nian, se Ministru Longuinhos dehan nia seidauk fó autorizasaun nusa nia la asegura de’it desizaun Primeiru-Ministru nian. Tansá nia tenke preokupa ho ami,” Adolmando Amaral tenik.

Adolmando akresenta UNPAZ realiza ona ninia atividade rua mak hanesan estájiu sosiál hahú iha loron 27 juñu ba estudante 1.200 no atividade ensinu aprendizajen normál bá estudante semester I, III no V hahú iha 28 juñu no iha loron 5 jullu, estudante semester V mós hahú ona sira nia estájiu profisionál iha sede suku sira iha Dili laran.

Magnífiku Reitór Dili Institute of  Technology (DIT), Alvaro Menezes, informa DIT seidauk hahú atividade tanba sei prepara hela kondisaun.

“Ami haree ona situasaun atu hahú ami nia atividade ensinu aprendizajen, maibé sei hein despaixu MESSK nian,” Alvaro Menezes hateten.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here