Logo Lao Hamutuk

DILI, 06 jullu 2021 (TATOLI)—Organizasaun Naun-Governamentál Lao Hamutuk (LH) fó hanoin ba Parlamentu Nasionál (PN) tenke diskute kle’an proposta-Lei Enkuadramentu Orsamentál (LEO) tanba proposta-lei foun ne’e atu substitui Lei Orsamentu no Jestaun Finanseira (LOGF-sigla portugés).

Notísia Relevante: Proposta-lei enkuadramentu orsamentál konsagra ho prinsípiu 11

Luta Hamutuk nia paresér ba Parlamentu Nasionál liuhosi Komisaun C ne’ebé trata Finansa Públika, konsidera Lei Enkuadramentu Orsamentu Jerál Estadu no Jestaun Finanseiru Públiku mak dalan ida atu hametin transparénsia no hadi’a jestaun osan povu nian ba futuru.

La’o Hamutuk hanoin katak Parlamentu Nasionál presiza konsidera didi’ak ezbosu Lei ida-ne’e, no labele lakon oportunidade atu kompriende, diskute, no sujere mudansa tanba lei refere sei fó impaktu maka’as ba kapasidade membru Parlamentu atu realiza sira-nia mandatu demokrátiku no mós kapasidade públiku atu partispa iha prosesu demokrátiku sira.

“Di’akliu atu adia lai tempu balun ba prosesu diskusaun ka debate ne’e, no husu Parlamentu Nasionál atu labele lalais liu foti desizaun hodi troka lei ne’e, nune’e bele fó tempu kle’an liu atu halo analiza ba konteúdu no sistema hirak ne’ebé propoin iha lei refere, atu nune’e la hafraku prosesu sira iha orsamentu,” La’o Hamutuk nia paresér ba Komisaun C ne’ebé Agência TATOLI, asesu iha Parlamentu Nasionál, tersa ne’e.

La’o Hamutuk husu Governu no Parlamentu Nasionál labele aproveita situasaun emerjénsia no limitasaun barak ne’e hodi foti desizaun ho lalais la ho informa ba públiku no hala’o konsultasaun antes, nune’e públiku, sosiedade sivil no entidade relevante sira bele hatene no kompriende kle’an kona-ba konteúdu, Sistema, informasaun no mós urjénsia ka intensaun husi mudansa ba lei ne’e.

“Ami mós apoiu ba komentáriu hosi Prezidente Tribunál Rekursu ne ebé haktuir hosi mídia Agência Tatoli katak Parlamentu Nasionál sira presiza atu haree no diskute kle’an kona-ba proposta Lei Enkuadramentu Orsamentál nune’e labele fó efeitu ba lei sira seluk inklui sujere atu organiza lei ne’e no forma atu hadi’ak liután buat ne’ebé iha daudaun, no importante liu atu iha preparasaun tékniku ne’ebé di’ak atu implementa ba lei ida ne’e,” La’o Hamutuk fundamenta iha paresér.

La’o Hamutuk sempre prontu atu oferese kontribuisaun analítiku hodi ajuda Deputadu sira hodi halo diskusaun kle’an liután ba proposta Lei Enkuadramentu Orsamentál iha debate plenária molok halo aprovasaun iha Parlamentu Nasionál.

La’o hamutuk rekomenda pontu ualu

Pontu ualu (8) ne’ebé La’o Hamutuk rekomenda ba Komisaun C relasaun ho proposta foun LEO no lei vijente (LOGF).

Pontu dahuluk (1) kona-ba artigu 7 ne’ebé previsru estabelese prinsípiu transparénsia, ho detallu kle’an kompara ho artigu 11 iha Lei númeru 13/2009 kona-ba jestaun orsamentál. Nune’e La’o Hamutuk sujere artigu 7.2, ne’ebé estabelese dokumentu sira-ne’ebé Governu obriga atu fahe ba públiku seidauk kompletu. Artigu 7.2 presiza inklui lista kompletu hosi dokumentu sira ka deskreve ho kle’an liu informasaun hirak-ne’ebé importante ba públiku atu hatene.

Nune’e mós Governu iha obrigasaun mós atu fó-sai dokumentu sira ba públiku tuir linguajen ne’ebé fásil ba públiku atu kompriende.

Pontu daruak (2) kona-bá artigu 39.3 ne’ebé fó opsaun ba Governu atu fornese tabela orsamentu ba tinan sira antes no tinan hurak tuir mai.

“lda-ne’e ami sujere atu artigu ne’e konsidera hanesan mandatóriu la’ós opsaun,” refere paresér hosi La’o Hamutuk.

Pontu datoluk (3) kona-ba artigu 48 ne’ebé estabelese obrigasaun atu hala’o jornada orsamentál kada tinan no Luta Hamutuk apresia artigu refere nune’e sosiedade sivíl mós bele partisipa iha prosesu governasaun liuhosi jornada orsamentál. Nune’e La’o Hamutuk sujere muda artigu 48 atu klarifika katak eventu no publikasaun jornada orsamentál nakloke ba públiku.

Pontu dahaat (4) kona-ba artigu 50 no 51 haree ba prosesu atu aprova programa ba entidade setór administrasaun públiku nian, tanba ne’e La’o Hamutuk husu atu hametin transparénsia no loke dalan ba koñesimentu no partisipasaun públiku iha prosesu demokrátiku liuhosi altera artigu ne’e atu kria rekerimentu, atu públika proposta programa ne’ebé entidade sira hato’o nomós programa finál ne’ebé Konsellu Ministru aprova.

Pontu dalima (5) kona-ba artigu 52 no artigu 56 ne’ebé haree ba asuntu aprezentasaun proposta OJE no fornesimentu proposta no dokumentu sira ba públiku. Luta Hamutuk apresia katak artigu 65 obriga Governu atu públika dokumentu xave sira, no mós versaun OJE simples liu hodi ema hotu bele kompreende.

Maske nune’e, artigu ida-ne’e falta atu define tempu bainhira Governu presiza públika dokumentu hirak ne’e, nomós falta atu define dokumentu saida mak presiza públika no lian publikasaun. Entaun La’o Hamutuk haree iha nesesidade atu hametin fali artigu 56 ne’e liuhosi inklui lista dokumentu sira-ne’ebé Governu sei públika no obriga Governu atu fornese proposta OJE ba públiku molok ka iha momentu hanesan aprezenta ba Parlamentu Nasionál.

Pontu daneen (6) kona-ba artigu 65 ne’ebé estabelese obrigasaun ba Governu atu prodús relatóriu mensál kona-ba ezekusaun OJE. La’o Hamutuk sujere atu altera artigu ida-ne’e atu inklui obrigasaun atu fornese relatóriu mensál ba públiku. Maske Artigu 65.4 inklui obrigasaun atu publika rezumu ida ba públiku.

“Ami hanoin katak públiku iha direitu atu asesu informasaun kompletu, hanesan ho Membru Parlamentu, iha tempu banesan,” La’o Hamutuk fundamenta iha paresér ba Komisaun C.

Pontu dahitu (7) kona-ba artigu 98-106 ne’ebé define obrigasaun Governu nian liga ho Konta Jerál Estadu (CGE-sigla portugés), La’o Hamutuk hanoin katak bainhira Governu aprezenta CGE ba Parlamentu Nasional, presiza mós fó sai ba públiku tanba proposta-lei artigu 106 katak Governu sei públika CGE iha Jornal Repúblika bainhira Parlamentu aprova tiha ona.

“Ami sujere atu inklui obrigasaun atu públika ba sítiu Ministériu Finansa nomós Jornál Repúblika nian iha artigu 104.1, hodi públiku bele asesu ba CGE iha momentu hanesan bainhira sira submete ba Parlamentu Nasionál, no bele fó komentáriu no input ruma. Se públiku hetan asesu ba dokumentu xave sira hanesan CGE hafoin desizaun foti no remata ona, ne’e la’ós transparensia. Ami husu mós atu muda artigu 101 atu asegura katak Governu publika tabela sira iha formatu Excel, hodi bele download, analiza ka halo kópia no gráfiku,” La’o Hamutuk fó hanoin.

Pontu daualu (8) kona-ba artigu 109.3 ne’ebé mensiona obrigasaun Governu nian ba iha relatóriu trimestrál atu submete ba iha Parlamentu Nasionál, nune’e La’o Hamutuk husu atu bainhira entrega ba Parlamentu Nasional presiza inklui informasaun sira hotu ho espesífiku no detallu, no importante mós atu fó-sai ba iha públiku.

La’o Hamutuk mós aprezenta paresér kona-ba prátika di’ak ba transparénsia no akuntabilidade hanesan Mid-Year review (relatóriu iha tinan klaran), relatóriu anuál, Governu tenke fornese dadus iha format Excel (La’ós PDF de’it) no sujere atu reforsa iha LEO ne’e ho Sistema konsultasaun no partisipasaun públiku.

Paresér ne’e asina hosi Peskizadór hosi La’o Hamutuk kompostu hosi Celestino Gusmão, Elizaria Febe Gomes, Bree Ahrens, Charles Scheiner, Marta da Silva no Mariano Ferreira.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here