Ministru Finansa, Rui Augusto Gomes. Imajen TATOLI/António Gonçalves

DILI, 06 jullu 2021 (TATOLI)—Governu liuhosi Ministériu Finansa (MF) propoin kualkér transferénsia orsamentu entre liña ministeriál tenke hetan aprovasaun hosi Parlamentu Nasionál, nune’e instituisaun Estadu iha setór públiku administrativa tenke hatene didi’ak planeamentu no orsamentasaun kada tinan.

Notísia Relevante: Orsamentu kada programa garante transparánsia no kontabilidade

Inisiativa ne’e Ministériu Finansa prevee ona iha proposta-lei enkuadramentu orsamentu Estadu no jestaun finanseira públika hodi troka Lei Orsamentu no Jestaun Finanseira (LOGF-sigla portugés).

“Alterasaun 20% iha artigu 95 iha proposta Lei Enkuadramentu Orsamentál (LEO) ne’e permite alterasaun liuhosi transferénsia entre orsamentu hosi ministériu sira to’o 20% hosi totál valór dotasaun. Agora proposta LEO ne’e estabelese katak kualkér transferénsia entre ministériu tenke hetan aprovasaun hosi Parlamentu Nasionál, nune’e Governu labele aprova kualkér transferénsia, maske nia valór inferiór 20%,” Ministru Finansa, Rui Augusto Gomes, esplika iha diskusaun no aprovasaun iha faze jeneralidade ba proposta-lei enkuadramentu orsamentu estadu no jestaun finanseira públika, iha uma fukun, tersa ne’e.

Governante ne’e fó razaun, atu reforsa Parlamentu Nasionál nia kna’ar no redús Governu nia kna’ar.

Razaun daruak iha proposta ida-ne’e katak liña ministeriál sira presiza responsabiliza sira-nia planeamentu no ezekusaun orsamentu nune’e liña ministerial sira iha tinan klaran labele hasoru problema sala ezekusaun ka neglijénsia.

“Lae, halai tún ka halai sa’e atu husu reforsu orsamentu. Tanba ne’e mak hamosu regra ida-ne’e, nune’e labele iha transferénsia entre ministériu sein hetan aprovasaun hosi Parlamentu Nasionál maibé ida-ne’e nakloke iha espesialidade atu ita debate,” nia subliña.

Tuir observasaun Agência TATOLI, katak durante ne’e ministériu balun iha tinan klaran tenke rekorre ba fundu kontinjénsia tanba atu selu saláriu ba funsionáriu la sufisiente.

Entretantu, preokupasaun ne’e Prezidente Tribunál Rekursu, Deolindo dos Santos, fó-sai katak Governu foti rezerva kontinjénsia kontra lei tanba fundu ne’e rezervada ba situasaun imprevista sira hanesan situasaun emerjénsia sira.

Notísia Relevante: La kondiz ho situasaun atuál, Governu propoin halo revizaun LOGF

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here