Ministru Defeza no Seguransa (MDS), Filomeno da Paixão de Jesus, hala’o kampaña vasinasaun kontra COVID-19, iha salaun administrasaun munisipál Bobonaro, tersa (06/07/21). Imajen Tatoli/ Sérgio da Cruz.

BOBONARO, 06 jullu 2021 (TATOLI)—Ministru Defeza no Seguransa (MDS), Filomeno da Paixão de Jesus, hateten Governu laiha intensaun atu estraga populasaun ho vasina COVID-19.

Tanba ne’e, Filomeno da Paixão de Jesus husu populasaun Bobonaro atu simu nafatin  vasina, nune’e bele aumenta imunidade ba isin hodi luta kontra korrente virus ne’e iha Timor-Leste (TL).

Notísia relevante:Loron haat, sidadaun Bobonaro 2.854 simu vasina

Governante ne’e ko’alia asuntu ne’e, relasiona ho inan-faluk Hilária de Jesus ho idade 73 ne’ebé hakotu-iis, hafoin simu vasina AstraZeneca iha suku Lour, postu administrativu Bobonaro, munisípiu Bobonaro foin lalais ne’e.

“Preokupasaun Governu oinsá populasaun TL tenke moris ho saudável, labele hanoin katak vasina AstraZeneca ne’e estraga ema, tanba Governu implementa programa ne’e laiha hanoin estraga populasaun,” Filomeno da Paixão de Jesus, hateten lia hirak-ne’e iha kampaña vasinasaun kontra COVID-19, ne’ebé realiza iha salaun administrasaun munisipál Bobonaro, tersa ne’e.

Husu mós ba pesoál saúde atu koordena ho autoridade munisipál, seguransa, inklui autoridade lokál, atu konsiensializa inan aman-sira kona-bá importánsia hosi programa vasinasaun ne’e.

Iha fatin hanesan, Prezidente Autoridade Munisípiu Bobonaro, Ernesto da Silva, apela ba populasaun Bobonaro, tenke simu vasina, hodi proteje-an hosi virus ne’ebé invade mundu no TL.

“Hakarak ka lakohi tenke simu duni, tanba úniku vasina mak bele kontra moras ne’e. Ita hela besik kedan fronteira, fásil tebes atu moras ne’e da’et,” nia apela.

Tuir dadus, Serbisu Saúde Munisípiu Bobonaro rejista ona populasaun 11.752 mak simu ona vasina, hosi númeru ne’e na’in 10.601 mak simu ona doze dahuluk no na’in 1.151 mak kompleta ona doze daruak.

Vasina ne’ebé oferese ba vasinante hirak-ne’e, doze dahuluk iha 9.500 no doze daruak hamutuk 1.500.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here