Koordenadór Gabinete Apoiu Sosiedade Sivíl, Filipe da Costa. Imajen TATOLI/Egas Cristóvão

MANUFAHI, 06 jullu 2021 (TATOLI)—Gabinete Apoiu Sosiedade Sivíl (GASC, sigla portugés) planeia lansa prémiu nutrisaun iha fulan-outubru tinan ne’e.

“Lakleur tan ami lansa prémiu nutrisaun sosiedade sivíl, ne’ebé ninia alvu ba autoridade lokál no grupu feto sira,” Koordenadór GASC, Filipe da Costa, relata iha ámbitu seremónia prátika tein hahán nutrisaun ba inan no oan iha suku Letefoho, postu administrativu Same, munisípiu Manufahi, tersa ne’e.

Notísia relevante: GASC apoia Fundasaun Alola prátika tein hahán nutritivu iha Manufahi

Ba kestaun ne’e, Koordenadór husu ba grupu joven inovadór sira atu halo prátika transforma ai-han fuik, tradisionál, no lokál ba ai-han nutritivu hodi bele kompete.

“Ami sei fó prémiu espesiál ba grupu ne’ebé apoia inan sira no prémiu seluk ba inan sira ne’ebé fó susu-been kompletu ba oan, halo tuir padraun nutrisaun sira ne’ebé rekomenda hosi Fundasaun Alola,” nia akresenta.

Nune’e, Filipe da Costa iha esperansa aldeia Tomonomo, suku Letefoho bele kompete no sai manan-na’in ba prémiu nutrisaun ne’e.

Antes ne’e, GASC relata ona ba Primeiru-Ministru, Taur Matan Ruak, kona-ba atividade ne’e no Xefe Governu apresia no konkorda ho programa ne’e.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here