Sekretáriu Estadu ba Protesaun Sivíl, Joaquim José Gusmão dos Reis Martins. Imajen TATOLI/Egas Cristóvão

DILI, 06 jullu 2021 (TATOLI)—Ministériu Administrasaun Estatál (MAE) no Sekretaria Estadu Protesaun Sivíl (SEPS), hatete família 140 hosi ema 730 ne’ebé sai vítima ba inundasaun iha loron 04 abríl liubá, daudaun ne’e nafatin hela iha sentru dezalojadu neen iha munisípiu Dili.

“Ita-nia família sira ne’e hela iha área risku hanesan mota ninin iha Comoro, Hera no Manleuana ne’ebé uma mota lori hotu”, Sekretáriu Estadu Protesaun Sivíl, Joaquim Gusmão dos Reis Martins, informa, hafoin enkontru ho Primeiru-Ministru, Taur Matan Ruak, iha Rezidénsia Farol, tersa ne’e.

Sentru dezalojadu neen mak hanesan Don Bosco Comoro, Asrama Canossa Hera ne’ebé muda ona ba Kapela Hera tasi ibun nian, Parokia Hera, muda ona ba Eskola EBC Acanunu, Sede suku Manleuana, muda ona ba kampu Real-Madrid Maleuana, Metiaut no Rate-ain, Dili.

Família ne’ebé sei kontinua hela iha sentru tanba uma hetan estragu totál kauza dezastre naturál.

Iha sentru dezalojadu, kada semana Governu liuhosi SEPS fó apoiu hahán inklui sasán nesesidade bázika, no iha ne’abá loke koziña jerál.

Nune’e, Governu kria hela ekipa interministriál ne’ebé lidera hosi Vise Primeiru-Ministru no Ministru Planu no Ordenamentu, José dos Reis, atu harii uma temporáriu ba vítima sira maibé presiza deside iha reuniaun Konsellu Ministru.

“Ita iha planu realojamentu ba vítima sira ho opsaun atu konstrui alojamentu temporáriu iha Hera, maibé sei iha faze diskusaun no tempu badak Konsellu Ministru halo desizaun,” nia hatutan.

Dadus ikus hatudu katak, família afetadu inundasaun iha loron 04 abríl hamutuk 33.835 iha territóriu tomak no rejista ema mate hamutuk 44.

Família hamutuk 2.558 maka daudaun hela iha área risku dezastre naturál iha munisípiu Dili, hanesan besik mota, foho-lolon no lagoa ninin.

Ministériu Justisa (MJ) liuhosi Diresaun Nasionál Terras no Propriedade (DNTP) identifika ona rai Estadu mamuk iha fatin tolu hanesan iha Hera ektare 20, Beduku ektare neen no Tibar ektare neen, atu halo realojoamentu ba vítima dezastre naturál ne’ebé hela iha área risku.

Jornalista : Florêncio Miranda Ximenes

Editora    : Julia Chatarina

HAKEREK NO HATÁN

Please enter your comment!
Please enter your name here