Prezidente ANPM, Florentino Mateus Soares Ferreira. Imajen TATOLI/Francisco Sony

DILI, 06 jullu 2021 (TATOLI)-Prezidente Autoridade Nasionál Petróleu no Minerál (ANPM), Florentino Mateus Soares Ferreira, hateten, autoridade sei uza eventu Expo Dubai 2020 hodi promove potensialidade petróleu no minerál.

“Ami mós bele aproveita aportunidade hodi partilla sasán balun promove no fa’an ita-nia bloku 18, kompostu hosi 11 iha tasi–laran no hitu rai-maran ne’ebé ita lansa ona,”Prezidente ANPM ne’e informa ba Agência TATOLI, iha Suai Room, Timor-Plaza, tersa ne’e.

Notísia relevante: MPM-ANPM enkoraja empreza sira tau konfiansa investe petróleu-gás bloku 18

Expo Dubai 2020 sei realiza iha Emiradu Árabe Unidu, entre loron 01 outubru 2021 to’o loron 31 marsu 2022 no espozisaun mundiál dahuluk sei realiza iha Médiu Oriente.

Nune’e, Governu liuhosi Ministériu Turizmu, Komérsiu no Indústria (MTKI) mak iha kompeténsia.

“Ita haree Expo Dubai sei iha oportunidade tanba iha konferénsia lubuk ho Asosieasaun Nasaun Sudeste Aziátiku (ASEAN, sigla inglés) no Europeia, ne’ebé ami partisipa hodi fó benefísiu mai ita,” nia akresenta.

Daudaun ne’e, ANPM aprosima ona kompañia besik 100-resin, maibé foin ko’alia ho kompañia 50 ne’ebé iha interese atu investe iha bloku 18.

“Kompañia sira ne’e ko’alia de’it ho ita, hakarak foti ita-nia dadus no halo estudu hodi haree ita iha potensialidade. Ami mós planu hela atu situasaun la’o di’ak  ba fali rai-li’ur hodi fizikamente fa’an bloku hirak ne’e,” Prezidente ANPM hatutan.

Estadu Timor-Leste liuhosi autoridade reguladór hamosu ona kalendáriu iha loron 01 outubru 2021, oras 16:00 sei taka konkursu públiku ne’e, nune’e loron 04 outubru to’o 03 novembru 2021 tama ba faze avaliasaun.

“Empreza sira sei submete aplikasaun liuhosi konkursu públiku no hatama  ba kaixa aprovizionamentu no to’o tempu mak loke atu haree kompañia hira mak iha interese ba bloku 18 iha área tasi-laran no rai-maran,” nia dehan.

ANPM sei anunsia manan-na’in ba konkursu públiku ne’e bainhira iha ona faze aseitasaun, nune’e iha loron 13 dezembru 2021 to’o 28 janeiru 2022 iha ona faze kontratu.

Bloku 18 ne’ebé identifika, tuir estudu sízmiku iha estrutura fatuk no basia ho kamada fatuk ne’ebé iha potensialidade boot bele akumula petróleu no gás.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here