Diretór Centro Juventude (CJ) Rejiaun Administrativa Espesiál Oé-Cusse Ambeno (RAEOA), Deonizio Ta’ek. Imajen Tatoli/Abilio Elo Nini.

OÉ-CUSSE, 06 Jullu 2021 (TATOLI)—Centro Juventude Rejiaun Administrativa Espesiál Oé-Cusse Ambeno (CJ-RAEOA) implementa planu prioridade tinan 2021 hodi halo formasaun Life Skill Basic Education (LSBE) no emprendedorizmu ba juventude sira.

Notísia Relevante: Parlamentu Foinsa’e identifika labarik feto kaben sedu tanba inan-aman obriga

“Iha tinan ida-ne’e, programa ne’ebé apoiu hosi Sekretáriu Estadu Juventude no Desportu (SEJD) hodi halo formasaun LSBE, liu-liu abilidade moris ba juventude ninian no formasaun Emprendedorizmu,” Diretór Centro Juventude (CJ) Rejiaun Administrativa Espesiál Oé-Cusse Ambeno (RAEOA), Deonizio Ta’ek, informa ba Agência Tatoli iha nia servisu fatin, Pante Makasar, Oé-Cusse, tersa ne’e.

Nia fundamenta, durante ne’e Centro Juventude RAEOA implementa atividade hodi reforsa polítika Guvernu nian liuhosi fó kapasitasaun no proteje juventude sira-nia kreatividade atu sai kreativu liután.

Atu hala’o atividade ne’e, Centro Juventude RAEOA hetan fundu hosi Guvernu liuhosi Sekretáriu Estadu Juventude Desportu (SEJD), Ajênsia Internasionál liuhosi Caritas Austrália ne’ebé halo kooperasaun no koordenasaun ho autoridade RAEOA.

“Programa ne’ebé mak hala’o hosi Caritas Austrália mak protesaun. Primeiru, sensibilizasaun informasaun bazea ba jeneru liu-liu ba kursu uma kain nomós formasaun mane hamenus violensia kontra feto, protesaun labarik nomós sensibilizasaun prevensaun juventude kaben sedu. Iha programa seluk mak treinamentu haki’ak animál, negósiu kiik no jestaun merkadória,” nia dehan.

Aliende me’e, Centro Juventude ne’e apoiu mós atividade fízika hodi fó apoiu fini ba grupu trajetu sira-ne’ebé kuda modo, haki’ak animál, hala’o negosiu hetan apoiu ho fundu kiik nu’udár fila-liman iha baze.

“Programa seluk hosi Caritas Austrália ninian mak atividade prevensaun COVID-19 hodi fasilita máskara, balde no sabaun ba grupu komunidade iha área rurál,” nia hateten.

Entretantu programa Guvernu ne’ebé Centro Juventude hala’o mak halo kapasitasaun ba juventude sira liuhosi kursu komputadór, treinamentu kreatividade juventude nian, kursu lian Inglés, no tuir planu sei hala’o mós kursu lian Portugés.

Diretór ne’e informa, fundu hosi Caritas Austrália iha 2020 ne’e hamutuk rihun $22 no iha 2021 ne’e SEJD apoiu orsamentu operasionál hamutuk rihun $18 ne’e, ba atividade treinamentu LSBE hamutuk rihun $25 no apoiu ba Empredorizmu nian ho montante rihun $33.

Iha tinan 2020, juventude sira-ne’ebé sai benefisiáriu ba programa SEJD no Caritas Austrália hamutuk ema 1.852 no dadus 2021 nian sedauk relata tanba atividade sei kontinua la’o hela, nune’e iha tinan ida-ne’e nia rohan mak foin relata.

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here