Autoridade lokál-sira iha postu administrativu Maliana, munisípiu Bobonaro, aprezenta preokupasaun no rekomendasaun ba Governu, kona-bá programa kampaña vasinasaun kontra COVID-19, iha administrasaun Bobonaro, tersa (06/07/21). Imajen Tatoli/Sérgio da Cruz.

BOBONARO, 06 jullu 2021 (TATOLI)—Autoridade Lokál postu administrativu Maliana, munisipiu Bobonaro husu Governu liu hosi Ministériu Interiór (MI) atu aumenta membru Polísia Nasionál Timor Leste (PNTL) no FALINTIL Forsa Defeza Timor Leste (F-FDTTL) hodi re-forsa seguransa iha liña fronteira terestre, hodi evita trasmisaun virus foun tama mai TL.

Xefe Suku Odomau, Cirílio Moniz Sirio Bere, hateten atu satan COVID-19, presija seguransa halo kontrolu movimentu ilegál iha liña fronteira, tanba daudaun ne’e sidadaun barak mak tenta hakat ilegál ba Indonézia.

Notísia relevante:Bobonaro hein desizaun MEJD implementa ensinu aprendizazen

Autoridade lokál-sira hato’o rekomendasaun ne’e, iha kampaña vasinasaun kontra COVID-19 hosi Ministru Defeza (MD), Filomeno da Paixão de Jesus, iha salaun administrasaun munisipál Bobonaro, tersa ne’e.

“Movimentu legál la lori moras ne’e mai ita nia rain. Sidadaun sira tama sai ilegál ne’e mak dada moras ne’e mai. Tanba ne’e, ha’u hakarak rekomenda ba Governu kontrola movimentu ilegál no mós ba organizasaun arte marsiál-sira atu ba sa’e sintu iha Indonézia,” nia hateten.

Sorin seluk, Xefe aldeia Tunubibi, suku Tapo-Memu, Fernando Raul mós preokupa no rekomenda atu fó atensaun sériu ba atividade ilegál iha liña fronteira, tanba realidade hatudu katak, iha Tunubibi atividade ilegál kontinua buras.

Ministru Defeza, Filomeno da Paixão de Jesus, konsidera preokupasaun no informasaun hirak-ne’e pertinente tebes no promete sei aprezenta iha reuniaun Konsellu Ministru, nune’e bele tau iha konsiderasaun.

“Informasaun hirak-ne’e di’ak tebes, aban ha’u sei foti iha Konsellu Ministru, nune’e ami bele foti desizaun ruma. Maibé, husu Xefe aldeia ho xefe suku-sira, nafatin fornese informasaun ba  seguransa hodi bele halo’o serbisu iha fronteira di’ak liu tán,” Ministru Defeza promete.

Evolusaun COVID-19 iha munisípiu Bobonaro, to’o 05 jullu rejista kazu detetadu foun iha oras 24 nia laran laiha, rekoperadu neen, kazu ativu 34, kumulativu rekoperadu 281, kumulativu kazu konfirmadu 247 no kumulativu óbitu tolu.

Jornalista: Sérgio da Cruz

Editór: Cirpiano Colo

HAKEREK NO HATÁN

Please enter your comment!
Please enter your name here