Vise-Ministru Interiór, António Armindo. Imajen TATOLI/Egas Cristovao.

DILI, 06 jullu 2021 (TATOLI)—Governu Australianu sei oferese ró ida ba Polísia Nasionál Timor-Leste (PNTL), atu monitoriza, proteze riku-soin tasi okos no halo vizilánsia iha fronteira tasi, iha koordenasaun ho forsa Navál FALINTIL Forsa Defeza Timor Leste (F-FDTL).

Prezensa ró ne’ebé sei utiliza hosi Unidade Polísia Marítima (UPM) ho objetivu atu prevene no kombate krime tráfiku droga, tráfiku umanu, terorizmu,  piratarias, imigrasaun klandestina no poluisaun marítima.

Notísia relevante:PM Taur inaugura postu UPM Akrema

“Agora daudaun iha negosiasaun hela no Austrália ne’ebé konkorda ona atu apoia ró ida ba PNTL,’’ Vise-Ministru Interiór, António Armindo, hateten ba jornalista-sira iha edifísiu UEP, Bairru-Pité, tersa ne’e.

Governante ne’e la esplika detalla kona-bá espesifikasaun ró ne’e tanba sei iha negosiasaun, maibé nia konsidera ró ne’e rasik bele ajuda UPM, hodi halo operasaun to’o kosta súl.

“Kona-bá bainhira mak ró ne’e atu mai no tipu ró ne’e oinsá, ha’u seida’uk hatene tanba sei iha prosesu negosiasaun,” nia esplika.

UPM nu’udár parte ida hosi Sistema Autoridade Marítima no estabelesidu espesifikamente atu fó vijilánsia no halo monitorizasaun ba área tasi-ibun no tasi sira Estadu nian tuir Lei Orgánika PNTL, Dekretu-Lei 9/2009, Artigu 32 (1), ho misaun ida ne’ebé inklui iha kuadru autoridade marítima maka, salvaguarda ema-nia moris iha tasi no fornese serbisu salva marítima (Artigu 32 (2) (f)).

Baze legál, IV Governu konstitusionál, Dekretu Lei nú. 9/2009, loron 18 fevereiru, Lei Orgánika PNTL, artigu 32.

Alende ne’e, hatuur mós iha Konvensaun Nasaun Unida kona-bá direitu tasi nian, parte VII, seksaun 1, hosi artigu 98, ho funsaun katak, TL nu’udár Estadu marítimu soberanu iha responsabilidade internasionál hodi fornese seguransa iha tasi laran no mós buka no salva ema ne’ebé uza ninia tasi territoriál rasik.

Unidade Marítima PNTL nian bele mós bolu atu buka ema ne’ebé lakon iha tasi laran, ka sai nu’udár vítima asidente marítima.

Fó asisténsia ba kualkér ema ne’ebé hetan susar no atu lakon iha tasi laran, atu kontinua ho velosidade maka’as hodi salva ema ne’ebé hasoru problema ruma, bainhira iha informasaun katak, sira presiza tulun.

Oras ne’e daudaun, totál membru UPM efetivu hamutuk na’in 120, fahe ba área tolu mak hanesan serbisu iha postu (Postu Batugade, Atabae, Atauro, Beloi, portaun portu Dili, no postu Com Lospalos), serbisu iha ró (ró NRTL Lusitania, NRTL Dili, NRTL Hera, NV Timor-Leste, speed boat 12, Kayrala), no Serbisu iha kuartál UPM.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here