Vise-Ministru Administrasaun Estatál (MAE), Lino de Jesus Torezão. Imajen Tatoli/ Francisco Sony'

DILI, 06 jullu 2021 (TATOLI)—Vise-Ministru Administrasaun Estatál (MAE), Lino de Jesus Torrezão, hateten prosesu selesaun ba Prezidente Autoridade Munisipál (PAM) no Administradór Munisipál (AM) ne’e diferente ho selesaun ba Administradór Postu Administrativu.

Prosesu selesaun ba Prezidente Autoridade Munisipál ho Administradór Munisipál loloos ne’e iha prazu loron bazea ba enkuadramentu legál ida-ne’ebé mak agora daudaun iha lei númeru 5/2016 no dekretu-lei númeru 3/2016 ne’e hateten klaru kona-ba selesaun espesiál ba Prezidente Autoridade Munisipál ho Administradór Munisípiu ninia intervinente dahuluk mak Ministériu Adminitrasaun Estatál (MAE), Komisaun Funsaun Públika (KFP), ho tan Primeiru Ministru (PM).

“Prosesu ba selesaun ba PAM no AM ne’e la hanesan ho selesaun ba Administradór Postu, tanba selesaun ne’e bazea dekretu-lei númeru 5/2016. Selesaun Administradór Postu ne’e lei Komisaun Funsaun Públiku (KFP) mak regula no ezame tuir regra KFP nian,” Lino de Jesus Torrezão hateten ba TATOLI, liuhosi telefónika, tersa ne’e.

Kandidatura ba Administradór Postu hotu-hotu ne’e selesaun pur méritu no selesaun ne’e fazeadamente la’ós tama dala ida.

Agora loke dahuluk ba postu administrativu 28 maibe iha semana kotuk ne’e loke ba postu administrativu 26, no iha postu administrativu balun mak seidauk loke selesaun, tanba tenke tuir selesaun pur méritu.

“Konkursu ne’e internál de’it. Depois atu fó ezame ne’e, selesaun sira-ne”e ramata ona mak foin tuir ezame iha Komisaun Funsaun Públiku. Bainhira simu pose ne’e, liuhosi Komisaun Funsaun Públika,” nia dehan.

Governante ne’e informa, Administradór Postu iha Munisípiu Dili nian kuaze ema-na’in 18 mak konkorre ba vaga ne’e maibé postu administrativu iha munisípiu seluk ne’e iha balun ema-na’in tolu ka haat hanesan ne’e.

“Ita seidauk iha dadus jerál ba Administradór Postu Administrativu nian, tanba balun tama ona ba faze selesaun dokumentu no balun seidauk, entaun ita seidauk hatene. Maibé bainhira selesaun dokumentu ramata ona mak foin ita hatene kandidatu hira mak liu ona selesaun dokumentu ne’e,” nia dehan.

Kona-ba kritériu ba kandidatu sira sai Administradór Postu, nia esplika, kandidatu tenke funsionáriu públiku no la haree ba kandidatu nia level.

Jornalista : Osória Marques

Editór       : Cancio Ximenes